ZALEN April 21, 2026: AMC 2026 Election neih zawh takah zanin dar 6:40 vel khan Polling Station zawng zawng khar a ni a, hriat theih chinah vote tla hi 61.14% a ni. Ward No. XIX chu vote tlak thatna ber niin Ward No. II (reserved seat) chu vote tlak chhiatna ber a ni.

AMC-ah hian voters 2,39,985 an awm a, heng zinga voters 1,10,335 hi mipa an ni a, hmeichhia voters 1,29,650 an awm. Vawiin hian mipa 66,415-in vote an thlak a, hmeichhia 80,304-in vote an thlak bawk a, vote tla hi 1,46,719 a ni.

AMC 2026-ah hian Ward vote tlak that berna Ward XIX-ah hian vote 67.22 a tla a, Ward No.II-ah hian 50.52 a tlat a ni. Polling station bikah Ward VIII-a Chite polling station chu vote tlak thatna ber niin 81.60% a tla a, Ward No. I-a Durtlang IV polling station chu vote tlak chhiatna ber niin 34.51% a tla.

AMC inthlan 2026-ah hian Ward No. VIII chu voter tlemna ber a niin vote nei mipa 3,670 leh hmeichhia 4,305 an awm a, voter zawng zawng hi 7,975 an ni a. Ward No. VIII hian veng pathum - Armed Veng, Armed Veng South leh Chite veng te a huam a ni.

Ward No. XVIII chu voter tamna ber niin mipa 8,697 leh hmeichhia 10,209 an awm a, voter hi 18,906 an ni a. Veng pariat - Tuikhuahtlang, Mission Veng, Model Veng, Salem Veng, Dam Veng, Venghnuai, Thakthing leh ITI veng te a huam a ni.

AMC inthlan 2026-ah hian Home voting dilna lut 2,768 zinga mi 2,594-in vote an thlak a. Vote thlak zat hi 93.71% niin thlak lo mi 174 an awm a, vote thak lote hi thi tawh te, damdawi ina awmte bakah vote thlak leh duh lo te an ni. Home voting avang hian voting percentage (%) hi danglam thei a ni.