ZALEN October 19, 2023 : Vawiina AMC huam chhunga ZPM candidate thalaite chuan ZPM an sawrkar a nih chuan an hmalakna tur te an sawi a, Tuna aia dinhmun sanga Mizoram thlenpui thei tur an zawnnaah Zoram Peoples’ Movement Party ah Beiseina thar an neih avanga he party hi zawm an nih thu an sawi bawk.

Aizawl North II bialtu Dr. Vanlalthlana, Aizawl South III candidate Baryl Vanneihsangi, Aizawl West II ZPM candidate Lalnghinglova Hmar, Aizawl West I candidate TBC Lalvenchhunga leh Aizawl East II candidate B. Lalchhanzove te chuan press statement intawm an siam-ah chuan, "Kum 1986 a state kan nih atang khan MNF leh Congress party ten kum 37 chhung Mizoram-ah thuneihna an lo chang tawh a. An theih tawk leh thiam ang tawkin hman an lain, an hun leh tha, sum leh pai te pawh Mizoram hmasawn nan an lo hmang tawh a ni."

"Tuna kan thlen chinah nu leh pa leh thalai ten hma sawn belh theihna tam tak an hmu, website leh social media kaltlangin India ram puma state khaikhinaah kan hniam chho hle tih kan hre thei a. Tuna kan dinhmun aia sanga min thlenpui thei tur kan zawnnaah Zoram Peoples’ Movement Party ah Beiseina thar kan nei ta a ni. ZPM party, la upa lo tak mai hian zirchianna leh ram hmangaihna nen Policy hmanga hmachhawp hrang hrang a neih te chu mi tam takin ram siamthatna atana rintlakah ngaiin an zawm sup sup ta a ni," an ti.

ZPM candidate te chuan, "ZPM-a sawrkar chuan awmze nei zawka sorkar kalpui a nih bakah mahni kea dingchhuak duhte dawm kan an nih dawn avangin state mipui ten nasa takin hma kan sawn dawn a. Mizoram mipuite, ZPM party lo support theuh turin kan ngen vek che u a. ZPM party-in Sustainable Development and Reform Policy (SDRP) hmang hian state intodelh, corruption nekchepna leh mi taimate dinchhuahna ram kan siam thei a ni," an ti bawk.