AMC huam chhungah kar khat total lockdown neih a ni dawn ; District dangah DC-ten ruahmanna an siam ang

Admin - Jul 18, 2021

Building khata in hrang hrang luahte pawh intlawhpawh khap a ni

Aizawl: Mizoram sawrkar chuan inkaihhruaina thar tichhuakin Aizawl Muni- cipal Area huam chhungah nizan dar 12 atanga ni 24.07.2021 zanlai dar 12:00 thleng Total Lockdown a puang a. Mizoram hmun dangah erawh chuan Deputy Commissioner-ten an District chhungah Covid-19 hri len dan dinhmun azirin inkaihhruaina hranpa an siam ang.

Chief Secretary, Mizoram & Chairman, State Executive Committee, State Disaster Management Authority Lalnunmawia Chuaungo-in thuchhuah a siamah hri kai an pun chak em avangin inenkawlna atana hmunhma leh hmanrua neih (health care facilities)-ten a zo lo thei mai dawnin a lang a. Hetiang a nih avang leh Covid-19 kai thar pung zel tur chhut chahna tura sawrkar hmathar lakna tihsamkhai nan Mizoram State Disaster Management Authority chuan Aizawl Municipal Corporation area huam chhungah total lockdown puan tulin a hria a ni a ti a. AMC area huam chhungah ni 18.07.2021 zing 00:00 hrs atanga 24.07.2021 zanlai dar 12:00 thleng Total Lockdown puan a ni a. Hemi hun chhung hian pawn chhuah leh inlenpawh khap tlat a ni a, building khata in hrang hrang luahte pawh intlawhpawh khap a ni, a ti bawk. 

SEC-in ruahmanna a siam ang chuan DM&R, H&FW, Home (Police, Fire & Emergency Services, Home Guard, Prisons, FSL), Excise forces, Finance, Treasury, District Administration, Civil Aviation, I&PR, FCS&CA, Forest, P&PI leh NIC/ICT te chu Covid-19 dona leh hna hmanhmawh/tul bikah an kal thei ang a. Mizoram Legislative Assembly Secretariat, Gauhati High Court (Mizoram Bench) leh a hnuaia court-te chuan ruahmanna siam angin an kal ang. Hei bakah hian Bank, ATM, post office, NGO leh Kohhran office te chu hna hmanhmawh leh tul zual thawk turin a tlem thei ang ber an kal thei ang.

Private company/ office, zirna in, sakhaw biak in leh inkhawm phal a ni lo a. Mitthi vuinaah mi 30 aia tam lo tel phal a ni a, inneih inkhawm ah DC phalna lak tur a ni a, mi 30 aia tam lo tel phal a ni. Public park, picnic spot, sports inelna, tournament, practice, zing leh tlai walk leh cycling exercise phal loh a ni.

Hospital, nursing home, clinic, tarmit dawr, laboratory, blood donation leh blood bank, Covid-19 vaccination leh immunization programme dang te, ambulance service, animal disease control programme, veterinary hospital, dispensary, clinic, zoo, hatchery, feed mill/ran chaw leh slaughter house, Petrol/Diesel filling station hawn phal a ni a. Bawnghnute sem, chanchinbu sem, private security, print & electronic media, telecommunication, internet service, broadcasting leh cable service, sanitation & solid waste management (hmunphiat leh bawlhhlawh paih te huamin) phal a ni.

State pawn leh State chhunga dawrkai leh sumdawngte bungrua, state chhunga thar/siam chhuah tiamin, online emaw phone hmanga order lawk sa te pek phal ani a, damdawi dawr hawn phal a ni a, eichawp dawr mamawh zual tan LTTF ten ruahmanna an siam ang.

Share now