Aizawl: Kum 2015-16 chhungin Aizawl Municipal Council chuan Rs. vaibelchhe 16 man hu contract hna 970 chu tender ko lovin contractor te hnenah a pe chhuak niin Annual Technical Inspection Report on Rural Local Bodies and Urban Local Body for the year ended 31 March 2016, Accountant General Office, Aizawl in a tihchhuah chuan a tarlang. Thudawn danin Rs. 50,000 chin chung lam hna reng reng chu a hmanhmawhthlak hle a nih loh chuan Central Public Works Department in a siam works manual ah chuan tender koh ngei ngei tur tih a ni a, hei hi Accountant General office chuan hna hmanhmawhthlak ni hlawm si lovin Aizawl Municipal Council chuan hna 970 hi tender ko loin a pechhuak niin a sawi a ni. 2015-16 chhung khan hna 1,270, Rs. vaibelchhe 16.96 man hu a pek chhuah a ni a, heng zinga 970 pekchhuahnaah hian tender koh a ni lo. Hei vang hian Accountant General Office chuan AMC-in dan a zawm lo niin a sawi. Thudawn danin Aizawl khawpui chhung mamawh culvert, side drain, foothpath leh a dangte siam nan 13th Finance commission sum atangin AMC chuan contract hna a pechhuak thin a, 2015-2016 chhunga hna 1,270 pawh hi 13th Finance Commission sum atanga thawh a ni.