Aizawl; Aizawl Municipal Council (AMC) in Aizawl chhunga building (inchhawng sang) hlauhawm a chhin chhiah 28 zinga 10 chu thiah a ni tawh. Aizawl Municipal Council thawktute hnen atanga Zalen thudawn danin Aizawl khawpuia in himlo 28 zingah hian thupek angin in 10 chu thiah a ni tawh a, 3 chu siamthat (retro fitting) a ni a, 14 chu tunah hian buaipui chhunzawm mek a ni a, 1 Pu B.Darchhinga building chu Court case awmlai anih avangin khawih theih a ni hrih lo thung. Tunhnaia AMC Vice Chairman Lalrinenga Sailo hova thukhawm chuan building hlauhawm chhinchhiah zing ami Pu Lallawmsanga Ralte building, Mission veng chu a him loh avangin in luahtute hnenah huntiam chhung a chhuak tura hriattir nise, Police Hqrs. building 2, Khatla ami chu thiat nghal tura order pek bakah Aizawl DC hnenah ti ruak nghal tura hriattir nise, Sanitation site office, Dawrpui ami chu P&E department in transformer dah nan a building thenkhat an hman avangin building zawng zawng thiah theih a ni lova, chuvangin transformer dahna chin chu siam tha turin hrilh nise an ti bawk a. Mission venga thingzai zawrhna Pi Laldailovi, Dr. Enghmingliani leh Pu Nghaka c/o Thanpuii building te chu a himloh avangin January, 2015 ral hma ngeia thiat tur leh ti ruak turin hriattir nise, Dawrpui veng chhung ami Pu VL Ruata, Pu Lalthuama, Pi G.Rotluangi leh Pu Lianchhawna building te chu PWD leh Geology mithiam ten an din hmun lo zirchiang se an ti bawk. Hei bakah hian Govt. Aizawl college building chung ber chu College zirtirtu ten thiat vek lova tihdan a awm em tia an ngenna angin a him leh himloh hriatna atan College hotute hma la tura hriattir nise, Lalthanpari building, Zemabawk North ami chu a hmunah en that leh nise, Mizoram Hindi Training College building Durtlang North te, Directorate of Accounts & Treasuries Office Chanmari leh MBSE building Chaltlang chung changah pawh a tul anga bawhzui zel nise an ti bawk.