ZALEN June 17, 2026: Aizawl Municipal Corporation chuan vawiin chhun khan AMC Conference Hall-ah Dawrpui Veng leh Chhinga Veng hruaitute kawmin ramri chungchanga buaina awm chungchang an sawi ho a, ramri chungchanga veng pahnihte inkara buaina chingfel turin Committee din a ni. Veng pahnih atanga khawtlang hruaitu kalkhawmte hian Committee in hma a lakna piah lamah hmalakna dang awm tawh lo se tih thu an pawm bawk.

Aizawl Mayor H. Lalremtluanga’n inkawmna hun hi a kaihruai a, AMC a Executive Corporator leh Official te bakah veng pahnih aiawhin Local Council leh NGO hruaitute an tel a ni. Aizawl Mayor chuan ramria buaina awm chu pawi a tih thu leh chinfel theih a nih a beisei thu a sawi a, buaina awm mek hi a fel thuai theih nan rilru zau tak pu turin veng aiawhte chu a ngen a. Remna leh muanna a awm theihnan Local Council leh khawtlang hruaitute chu hma la turin a ngen bawk. 

Veng aiawhte chuan an ramri chungchanga buaina chungchang leh a kaihhnawih thil thleng dangte pawh sawi hoa chingfel turin lungrual takin Committee on Land Dispute between Chhinga Veng and Dawrpui Veng hetiang hian an din:

Chairman  : Pi R. Lalawmpuii, Deputy Mayor, AMC.

Vice Chairman : Pi B. Lalawmpuii, Corporator, Ward No. 9

Secretary  : Pu K. Vanlalruata, Deputy Municipal Commissioner

Members    : 

1) Pi Christina Roluahpuii Sailo, Executive Corporator, AMC

2) Pu Vanlalhruaia, Executive Corporator, AMC

3) Pu Vanlalfaka, Executive Corporator, AMC

4) Pu K Lalrodinga, Executive Corporator, AMC

5) Chairman & member pakhat, Local Council (Dawrpui & Chhinga Veng)

6) President & Secretary, YMA (Chhinga Veng & Dawrpui)

7) President & Secretary, MUP (Dawrpui & Chhinga Veng)

8) President & Secretary, MHIP (Chhinga Veng & Dawrpui)

9) Pu R. Rosiama, Chhinga Veng (Prominent Citizen)

10) Pu Vanlalbika, Dawrpui (Prominent Citizen).

Khawtlang hruaitute chuan, “Vawiina veng aiawh kalkhawmte hian Committee on the Land Dispute between Chhinga Veng and Dawrpui in hma a lakna piah lamah hma lak rem kan ti lo a, hmalakna dang reng reng engmah a thlen loh nan hma kan la ang,” tiin resolution an siam bawk.