Aizawl: Aizawl Municipal Corporation (AMC) chuan Tuikual South Local Council huam chhung, Horticulture leh Agriculture Directorate building kawt vela Inrinnia inzuar thin te tan kalphung thar a ruahman. Bazar kalphung thar hawnna inkhawm hi nimin khan Horticulture hall-ah neih niin AMC Commissioner leh Town Vending Committee Chairman ni bawk Dr. H. Lalthlangliana leh AMC Ward No XII Councillor R. Thanglura ten thu an sawi a. Vanlalsawma Executive Officer, AMC in Report a pe a ni. Tuikual South Inrinni Bazara thu thin te hi AMC in a chhinchhiah dan chuan mi 144 an ni a. Heng mi te hi AMC chuan kum khat chhung atan License hi pein a register a. ID siamsak vek an nih bakah an thil zawrh dahna tur dawhkan pawh pek an ni. He vending zone siam tharah hian mi pakhatin ni khatah Rs. 50 zel fee an pe thin ang a, fee hi Tuikual South Local Council in an khawn thin dawn a ni. An fee khawn atanga Rs. 20 /- hi Tuikual South LC ten AMC-ah a chhung lut thin dawn a ni.