ZALEN June 18, 2026: Aizawl Municipal Corporation chuan July 1 - October 31, 2026 chhungin Aizawl khawpui, AMC huamchinah lei laih, leivung hmanga khuar hnawh leh a kaihhnawihte a khap.

The Aizawl Municipal Corporation (Site Development & Slope Modification) Regulations, 2017 in thuneihna a pek angin fur ruahtui tam laia hmunhma siamremna tura leilaih leh a kaihhnawih te khap tura Aizawl Municipal Corporation thuneihna a tarlan angin July 1 - October 31, 2026 chhungin Aizawl khawpui, AMC huamchinah lei laih, leivung hmanga khuar hnawh leh a kaihhnawihte khap a ni. He khapna bawhchhiate chu Mizoram Municipalities Act, 2007 Section 137, 374 leh 386 hmangin hrem theih an ni ang.

He khapna kenkawh chhung hian chhiatna lian zawk a thlen lohna tura tul bik thilah phalna dil theih a ni ang. Hetiang tul bik thilah chuan a hmunhma dinhmun chiang taka tarlangin Aizawl Municipal Corporation-ah dilna thehluh theih a ni ang a; dilnate hi a hmunah uluk taka enfiah tur niin phalsak ngei ngei tur tihna a ni lo.

Lei laih khap hian thlan laih te, chhiatna thleng avanga leimin senghawi leh thenfai tula chetna te, tul bik thil avanga phalna pek te chu a huam lovang.