Aizawl: Aizawl Municipal Corporation (AMC) chuan Aizawl khawpui ah Property Tax khawn thuai an tum a, Property tax atanga sum lut zaa sawmriat (80%) chu mipuite mamawh siamnan pekchhuah leh an tum. Nimin khan AMC Deputy Mayor Lalringliana hovin Councillor mi 6 ten Aizawl Press Club tlawhin MJA te nen an inkawm a, Deputy Mayor chuan Property Tax khawnna tur atan survey zawh tawh a ni tiin data pawh sofware ah dahluh vek a ni tawh tih a sawi a. Property Tax chu Local Council kaltlanga khawn tur anih thu sawiin hunpui Krismas leh Kumthar tibuai lo thei ang bera khawn tum a ni, a ti a. “Tax atanga sum hmuh 80% hi mipui mamawh ah hman leh tur a ni a, 5% hi Local Council ah pein a bak 15% chu thawktute tan dah a ni a. Mipuite thahnemngai leh phur taka pe turin ka sawm a ni,” a ti bawk. AMC hmalakna thenkhat sawiin solar street light kalpui mek a niin October 2016 chhung hian Local Council tinah 8 theuh phun zawh beisei anih thu te, AMRUT hnuaiah footpath engemaw zat siam tum anih thu te, Housing for All (PMAY) kalpui tan mekah AMC kaltlangin mi 3000 chuang dilna an dawn tawh thu a sawi. Deputy Mayor chuan AMC chu a changtlung zawngin a kal chhoh zel thu sawiin sum leh paiah pawh kalphung mumal zawk an zawh tan thu a sawi a. 13th Finance Committee hnuaia basic fund, hlawh leh thil dang atana a rem leh tul ang anga an hman pen ang kha 14th Finance Commission hnuaiah chuan a ni tawh lo a, dil chawp fo ngai tawh lovin constitutional bodies dang - Autonomous District Council te sum dawn dan ang thoa state-in sum a lakluh atangin a sem tawh dawn tih a sawi a. Hemi chungchangah hian state sawrkar chungah pawh an lawm thu a sawi a. Tuna AMC budget cheng vaibelchhe 31 ni mek chu vaibelchhe 20 grant niin, a bak vaibelchhe 10 (30%) chu AMC-in a thawhchhuah ve tur a ni tih a sawi bawk a ni.