ZALEN Oct. 8, 2025: Aizawl Municipal Corporation in Aizawl City Traffic Police te tana a lei sak T Shirt – 315 nos. leh Lukhum (baseball cap) – 315 nos. te chu vawiin chawhma dar 11 khan AMC in Aizawl City Traffic Police te an hlan a. 

Hlanna hun hi AMC Conference Hall, Thuampui ah hman niin Joseph H. Lalramsanga, Municipal Commissioner in a kaihruai a; Aizawl Mayor Lalrinenga Sailo leh Deputy Mayor R. Thanglura ten Ruatsanga Ralte MPS, Sr. Superintendent of Police (Traffic) leh a thawhpui te hnenah an hlan a ni.

Aizawl Mayor Lalrinenga Sailo chuan AMC chuan khawpui Sorkar a nih angin Aizawl khawpui inrelbawlna kawngah mawhphurhna tam tak a nei a, an hmalakna kawngah Aizawl Traffic Police te nen thuneihna kenkawh thawhhona tha tak nena mipui tan an tanrual thin thu leh hun lo kal zelah pawh thawhhona tha zawk an neih a beisei tih a sawi a; hun kal zelah inmamawh tawn hun a awmin intanpui zel tur an nih thu leh AMC chu Aizawl khawpui inrelbawlna tha zawk thlen theihnan thawhhona kawngah a inhawng a ni a ti.

R. Thanglura, Dy. Mayor, AMC chuan ram dang atang pawhin Aizawl-a Traffic discipline thatzia min lo hriat sak hle thu sawiin hna thawk tha chhunzawm zel tur leh inhretawn zel turin Traffic Police te chu a chah.

Ruatsanga Ralte, Sr. SP (Traffic), Aizawl chuan Aizawl City Traffic Police te chu smart, fresh leh polite taka awm tura tan an lak thu leh mi tamtak tan Mizoram hmel lanna an nih avangin tan an la nasa hle a ni a ti a. An hnathawh hahna hriatpuitu leh duhsaktu AMC chungah lawmthu a sawi.