ZALEN April 27, 2026 : April 21, 2026-a AMC inthlan result kimchang hriat a nih hnuah, hnehna sang tak chantir annih avangin Pathian leh Aizawl khawpui mipui te chungah ZPM General Headquarters chuan lawmthu an sawi.

ZPM chuan vawiina chanchinthar lakhawmtute an hmachhawn naah hian lawmthu bakah an tlin chhan leh an hmalanna tur te sawiin, "Boruak muanawm tak hnuaiah inthlan leh kaihhnawih vote chhiarte tluang taka zawhfel a lo ni ta a. Inthlan buatsaihtu State Election Commission te, vote thlakna lama mawhphurtu polling party te, dan leh thupek kengkawhtu Police te, MPF te leh vote thlak tu Aizawl khawpui mipuite chungah lawmthu kan sawi tak meuh meuh a. He inthlana ZPM in hnehna kan chan ngei theih nana thawktu ZPM General Headquarters hruaitu te, Minister leh MLA te, Board Chairman te, party level hrang hrang - Block, Ward Campaign Committee, Unit leh mimal campaigner te chungah lawmthu kan sawi bawk," an ti.

ZPM chuan AMC result hian, State Sawrkar mek ZPM Ministry hi mipuiten an rin tawk zia a tarlang a, khawpui ber Aizawla Municipal Sawrkar siam tur pawhin mipui ten an ring tawk hle tih a tarlang bawk. Chuvangin, ZPM AMC chuan ram leh hnam tan, Aizawl leh mipuite hmasawn nan, Election Manifesto ang taka Municipal Sawrkar tha din turin theihtawp an chhuah dawn niin an sawi.

ZPM in an chakna chhan thenkhat langsar zual nia an sawi te chu: 

1. Nikum Local Council inthlan February 2025 ah khan MNF leh Congress in ZPM an beihrawn nasa a, langsar taka thawhhona veng pawh an nei nual a. Tun tum AMC inthlan hian thawhho duh siin, thawkho ngam tawh chiah lovin an awm a, chutichungin a ruka inpuihtawnna ward pawh an nei hialin ka hria a. LC inthlanah mahnia ding ngam tura an huaisen tawk lo kha tun AMC inthlanah hian an tuar ta niin a lang. 

2. Manifesto duan kawngah kan serious berin kan hria. ZPM hian AMC inthlan atan hian Manifesto kan duang uluk hle a, ZPM Research Wing ten Manifesto duan kawngah mawhphurhna an la a, kan corporator neihte an rawn bawk a, kan serious hle a. Hei hi Aizawl mipuite hian min hlutsak niin a lang. 

3. Candidate thlan danah pawh kan uluk berin kan ring. Candidate thlan danah Constituency tinte rawn chunga ruahmanna siam a ni a, Kalphungthar auhlaa chhum hminte kan candidate thei vek a ni.  

4. Kan auhla langsar thenkhattte; ‘Aizawl tha zawk,’ ‘AMC langtlang zawk,’ ‘A chhe lai siamthatu’ tih te an ni a. Heng kan auhla te hian Aizawl mipui pawm a hlawh niin a lang bawk. Party dang ten auhla atan tum mumal leh mipui pawm zawng tak an nei lem lo a, thu tak awm lem lo. ZPM beih vak vak kha an au dan a ni ber a, khatiang ang kha Aizawl mipui ten an hnuchhawn tawh niin a lang bawk. 

5. Kawngpui siam danah AMC inthlan dawn chauha siama Sawrkar puhna a nasa hle. Kawngpui siam a tul avangin Sawrkarin a siam a ni mai. Furpui rawn thlen hmaa a tam thei ang ber siam hi tinzawn ber a ni. AMC inthlan zawhah pawh Sawrkarin kawngpui a siam chho zel dawn a ni. Aizawl bik tinzawna kawngpui siam a ni lo a, Aizawl pawn lam Lunglei leh Kolasib lam te siam a ni a, Champhai pawh kutthlak tan a ni. 

6. Mipui ten AMC an hmuh dan hi ZPM chuan tih danglam a tum dawn a ni. Aizawl mipuite hian AMC thatna leh hlutna hi kan hre tawk lo hle; AMC kan neih tawh danah hriat theih tura tih tak taka hmalakna a tam lo pawh a ni thei. Engpawhnise ZPM chuan Aizawl khawpui sawrkar, mipuite tel vena din ngei a tum a ni. 

Hmalakna hmasa atan an ruahman te : 

ZPM AMC chuan Election Manifesto hi road map atan a hmang dawn a, Manifesto zawng zawng hi ngaihpawimawh vek tur a nih rualin, hmalakna hmasa tur han tarlang ila:-

1. AMC hi mi tin ban phaka hnuhniam kan tum. Hemi atan hian Mobile App leh AMC Community Help Desk siam a ni ang.

2. AMC in mipui atanga sum a khawn hrang hrang te langtlang taka hman a ni dawn a, hmuh zat leh hman zat te mipui hriattir a nih dawn bakah; mipui chhawr tangkai theih tur zawngin a hmanna ruahman a ni ang.

3. AMC Area chhung ni si, PHE Connection la nei ve lo te tan a kaihhnawih department nen tangrualin tui thianghlim pek thuai tum a ni ang.

4. Aizawl khawpui chhunga Vawk vulh khapna dan hi ennawn a ni ang a. Zirchianna ?ha zawk leh ruahmanna tha zawk siamin Vawk vulha eizawngte tan ruahmanna siam a ni ang. 

5. Mizoram Municipalities (Amendment) Act, 2015, Section 75 (A) in a sawi angin Aizawl Khawpui chhunga mi rethei zawk (Urban Poor) te chawikang turin hma lak a ni dawn a, hemi atana budget dah pawh a nih ang taka hman a ni ang.

6. AMC hian Ran talhna (Slaughter house) a la nei lo a, Aizawl khawpui daifem hmun remchangah siam tum a ni ang.

7. Khawpui faina kawnga hma kan sawn zel theih nan a theih angin Solid Waste Management Center tichangtlung tura hmalak a nih dawn bakah, kan bawlhhlawh khawn dan leh paih dan kalphung ennawn a ni ang.

8. Building Permit & Lei laih Permit (SD&SM) regulation ennawn a ni ang a, a muan chhante uluk taka zirchiangin, chak zawk / rang zawka kalpui tum a ni ang a, architect/engineer/supervisor rawih man rate pawh mumal zawka siam turin hma lak a ni ang. 

9. AMC in Finance Commission Grant a dawn that theih nan Own Source of Revenue (OSR) neih that a tul hle a. Chuvangin, AMC OSR siam thei tur asset lian (mipui chhawr theih tur ni si) siam kawngah hma lak a ni ang.

10. Apartment Rules: In chhawng tin / Floor tinin LSC ang chi an neih theih nan hmalak a ni ang a, hemi dan hi Assembly a put luh a, remtih a nih hnu-ah AMC in a umzui ang. 

ZPM chuan AMC hi Party invulh nan ringawt hman a tum lo a, a chhe lai siamthatu ni tura thawk turin; Aizawl tha zawk, langtlang Municipal sawrkar din a tum a, Aizawl First tiin ZPM AMC chuan ro a rel dawn tih an sawi bawk