ZALEN January 11, 2026: Mizoram State Election Commission chuan Aizawl Municipal Corporation (AMC) inthlan buatsaih turin ruahmanna a kalpui mek a, inthlan buatsaih hun tur erawh hriat theih a la ni lo.

ZALEN zawhna chhangin State Election Commissioner (SEC) Dr H Lalthlangliana chuan AMC inthlan atan nikum atang khan inbuatsaihna hrang hrang kalpui a ni tawh tih a sawi a, inthlan ni tur tak erawh ruahman fel a la nih loh thu a sawi a. “AMC inthlan atan kan inbuatsaih mek zel a, inthlan hun tur hi a hun takah puan a la ni ang,” tiin a sawi.

AMC term kal meka corporator-te chu March 1, 2021-ah lak luh an ni a, March 1, 2026 hi an term tawp hun tura ngaih a ni.

Aizawl District Election Officer (DEO) Lalhriatpuia, District Bawrhsap chuan January 7, 2026 khan DC Pisapui Hall-ah kumina AMC inthlanpuia hman tur electoral roll a tlangzarh a. Roll tharah hian voter 2,39,989 an awm.

AMC electoral roll ennawnna, Electoral Rolls Summary Revision, 2026-ah hian State Election Commission thuchhuak angin January 1, 2026-a kum 18 tlingte thun theih a ni a, final electoral roll-ah hian voter 2,39,989 awmin mipa 1,10,333 leh hmeichhia 1,29,656 an ni a, mipa aiin hmeichhia 19,323-in an tam zawk.

AMC electoral roll siam thatna tura behchhan draft electoral roll chu September 24, 2025 khan tihchhuah a ni a, draft roll-ah khan voter 2,34,172 awmin mipa 1,08,703 leh hmeichhia 1,25,469 an ni.

AMC electoral roll hi MLA roll nen a hranpaa buatsaih a ni a, hemia inthun thar, insawn (transfer) leh siam that (correct) te hi MLA roll atan a rin nghal theih a ni lo.