Aizawl: Aizawl Municipal Corporation inthlan loawm turah MNF Party chuan party mala chuh an tum a, Congress leh MPC party te thawk hovin ZNP hawi lam tur a la chiang lo. AMC inthlan hi tunkar chhung hian SEC chuan puan hman an tum nia thudawn a ni. Nimin khan MNF party thuneitu sang Elected OB leh Nomination Committee chu Hnam Run-ah party President Zoramthanga hovin an thukhawm a, AMC leh Lai Autonomous District Council inthlan chungchang an sawiho. Thutkhawm an neih zawha thuchhuah an siamah MNF chuan, “Aizawl Municipal Corporation (AMC) leh Lai Autonomous District Council (LADC) inthlanna lo awm turah hian sawrkar nghelnghet leh rintlak siam ngei a nih theih tawh nan, MNF Party chuan he inthlanna hi hmachhawn a tum a. Hemi atan hian mi zawng zawngte thlawpna leh thawhpuina a ngen a ni,” an ti. Zalen thudawn danin MNF Party hian thawhpui nei lova heng inthlan pahnih hi chuh an tum a, naktuka Party chhung inkhawm ah Party President Zoramthanga’n a puang ang. Nimin MNF meeting ah hian mi 74 an kalkhawm a ni. AMC-ah hian Congress leh MPC chuan thawhho an tum a, MPC hian seat 5 changin an bial chan tur erawh an la tifel lo nia thudawn a ni. Hetih lai hian ZNP hawi lam tur a la chiang lo a, Zalen-in a biaknaah ZNP Vice President K.Liantlinga chuan AMC chungchang chu karleh lamah ngaihtuah an tum tih a sawi a, “State leh AMC ah hian Congress sawrkar hi awm tawh lo se kan ti a, dik leh rinawm taka thawk tur te chu tupawh kan thawhpui thei a ni,” a ti.