ZALEN February 2, 2026: Vawiin khan Mizo Hnam Runah chhung inkhawm neih a ni a. He hunah hian Aizawl Mayor Lalrinenga Sailo chuan thu a sawi a. MNF kaihhruai AMC hmalakna leh ruling sawrkar dinhmun enin AMC inthlan neih turah MNF-in sawrkarna an chan leh ngei a beiseiawm niin a sawi.

Lalrinenga sailo chuan, "ZPM sawrkar enchhin duhin mipuiin kan thlang tling a. Kum khat an sawrkar hnu maiah inthlanna hrang hrangah ZPM hian chakna an chang zui ta meuh lova. Village Council leh Local Council inthlan kha phur takin a hun hmain an kalpui lui a, chutah pawh chuan an beisei an pha lo nasa hle. Tun hnaiah LADC inthlanah ruling party ZPM chu an chak lo leh hle a, hengte avang hian AMC inthlan pawh hi an huphurh a, an tikhawtlai ta rih niin a ngaih theih a ni," a ti.

Aizawl Mayor chuan, "Aizawl khawpui hi chak zawka hma a sawn theihna turin MNF enkawl sawrkar chuan Municipal Act 2008 siamin Aizawl khawpuiah Municipal hi din a ni. Chuvangin, AMC-ah hi chuan MNF hian neitu nihna kan nei a, Aizawl khawpui hmasawnna tura hmalakna kawngah Aizawl khawpui mawina leh hmasawnna tur hi kan dah hmasa fo a ni. Finance Commission atanga sum kan dawn State sawrkar atanga tihkhawtlai ni mah se theih tawpa hmasawnna hrang hrang kan thawk a, chung zing langsar zual te chu - 1. AMC Multi Complex, Tuikual , 2. AMC Plaza, Bawngkawn, 3. City Bus Terminal, Zemabawk, 4. AMC Sport Complex, Brigade Field, 5. AMC Eco-park, Luangmual, 6. AMC Eco-Park Reiek, etc an ni a. AMC hmalakna tha tak avangin VBC 55 zet kan dawng hial a. Sum hi a tam tham avangin UD&PA kutah a lut a ni," a ti.

Rinenga chuan, "India hmar chhakah Municipal tha ber pawl kan ni a, MNF-in term 2 kan chelh chhungin hmasawnna tam tak kan nei a, khualzin veivak te hmuh tlak Aizawl khawpui fai siam kawngah te, Silent City ni thei tura hmalaknaah pawh hian AMC chuan Trafic Police te chu parking leh kawng thawm leh chei mawi kawngah theihtawpin kan thawhpui a ni. MNF kaihhruai AMC hmalakna leh ruling sawrkar dinhmun en hian AMC inthlan neih turah hi chuan MNF hian sawrkarna kan chan leh ngei a beiseiawm a ni," a ti.