ZALEN January 21, 2026: MPCC Spokesperson Dr. Lallianchhunga chuan January 16, 2026-a thuthar thehdarhtute kaltlanga Aizawl Municipal Corporation (AMC) Election chu tuna AMC Term ral hma a buatsaih a nih dawn loh thu leh inthlan puan theih loh chhan State Election Commission (SEC) in a sawi chu chhuanlam tling lo leh democracy palzut naah an ngaih thu a sawi.

Dr. Lallianchhunga chuan Dampa bial bye election a an chak loh avang leh LADC inthlana pathumna an nih avangin ZPM sawrkar hnuaiah AMC Election hi a hun taka buatsaih tumna a awm lo sa hrim hrim niin an ngaih thu a sawi. Hetiang hi AMC inthlanpuiah pawh a thleng leh thei a ni tih hriain chhuanlam hrang hrang an siam a, State Election Commission (SEC) chu AMC inthlan a tihkhawtlai tir tih hi mipui rin dan a ni a. AMC inthlan tihkhawtlaina atana chhuanlam an tarlan te hi State sawrkarin a chinfel theih vek thil a ni a ti.

Sawrkar hnathawk ten Budget leh Financial Year Closing an buaipui a ngaih avanga Election Duty tur indaih loh chungchang an chhuanlam pawh Sawrkar kum tawp (Financial Year) buaipui hi Department hrang hrangah Billing Section leh Cashier te an ni deuh ber, Deptt staff zawng zawng an buai ngai lo an ti.

HSLC leh HSSLC Board Exam chhuanlam – Board Exam buaipuitu tur zirtirtute Election Duty a chhawr loin, zirtirtu dang hman tur an tam tawk niin an sawi. 

Mizoram sawrkarin kumin Chapchar Kut March 9 atanga tanin kar khat chhunga lawmna buatsaih a tum a. Cl X leh Cl. XII Board Exam laia mipui punkhawmna tur a buatsaih hreh loh dan atang hian AMC inthlan tihkhawtlai chhana Board Exam puh daih hi a inhmeh lo a, ZPM sawrkar hi huau huau Sawrkar a nihna a lang chiang an ti bawk.

Congress Spokesperson chuan LADC EVM chhuanlam pawh chhuanlam a tling lo an ti a, Mizoram state pumpui MLA bial 40 daih EVM a awm lai a, LADC huam chhung bial 25 a hman loh EVM tam tak awm tura an ngaih thu an sawi.

Budget Session chhuanlam pawh Budget Session hun hi AMC Election nena insu buailo tura ruahman theih a ni an ti. 

SEC-in ‘AMC Election chungchangah state sawrkar a inrawlh lo’ tih pawh hi state sawrkar rawn loin eng Election mah a buatsaih thei lo zawk a ni, an ti. 

Congress chuan ZPM sawrkarin AMC Administrator ruat ngai hial khawpa AMC Election a tikhawtlai hi Democracy palzutna dik tak a ni a, mipui zahlohna pawh a tlingin an hria. AMC Election tikhawtlai tur hian inthlan buatsaih theih lohna khawpa harsatna lian tham Mizoramah a thleng lo a. Chhuanlam an siam te hi AMC Election tihkhawtlaina atana chhuanlam tlinglo vekah an ngai a. Chuvangin, ZPM sawrkar hian a rang lama AMC Election buatsaih turin an ngen a ni.