Aizawl May 21, 2024: Vawiin khan Aizawl Mayor Lalrinenga Sailo hovin AMC Corporator te leh Officer leh staff te chuan Save The Riparian chetlak mekna Tuikual Lui-ah hnatlangin Save The Riparians te nen an thian fai. He hnatlangah hian mi 150 chuang an thawk chhuak a ni.

Tuikual Lui hnar, Khatla Veng Field thlang kawr atangin bawlhhlawh chi hrang hrang - plastic bottle, sarang, burchhia, pawnchhia leh a dangte an thiar chhuak a, AMC motor hmangin bawlhhlawhte hi Solid Waste Management Center, Tuirial-ah an paih nghal a ni.

He hnatlang hawnna hun hi Romalsawma (Roma Hmar), Save The Riparian in a kaihruai a. Aizawl Mayor Lalrinenga Sailo chuan thu sawiin, Save The Riparian te hmalakna chhuanawm a tih thu a sawi a. AMC in Aizawl khawpui faina kawngah theihtawp a chhuah mek tih sawiin nasa leh zualin hma a lak chhunzawm zel tur thu a chah bawk.

He hnatlangah hian Aizawl Mayor bakah hian R. Thanglura, Dy. Mayor; Executive Corporators te ; Corporators te; Er. Lalhriatpuia, Municipal Commissioner leh AMC Office-a thawktute leh Save The Riparian hruaitute leh member te an thawk chhuak a. Hnatlanga thawk chhuak ten faina kawnga tha an thawh thei chu lawmawm an tih thu an sawi.

AMC chuan a hmun lova bawlhhlawh paihin kan chenna leilung a tihchhiat mek thu leh nungchate tan thihna a thlen nasat thin avangin bawlhhlawh paihna hmun a siamah chauh bawlhhlawh paih thin turin mipuite a ngen a. Veng tinah bawlhhlawh khawn thin a ni a, hengah te chauh hian kan bawlhhlawh te tha taka thliara paih thin turin Aizawl mipuite a ngen a. Faina leh thianghlimna kawngah hma sawn kan tum avangin loh theih lohin dan leh inkaihhruaina zawmlote chungah hma a la zel dawn a ni tih Aizawl mipuite hriattirin a ngen a ni.