Aizawl August 30; Pawl hrang hrang telna Joint NGO Coordination Committee chuan AMC Licensing Regulations duh loh entirnan naktuk hian AMC pisa kai tur chu dan an tum a, hetih lai hian naktuk chawhnu lamah AMC a sawrkarna siam mek MNF, MPC leh ZNP hruaitute leh NGO hruaitute hi remna zawngin inbiak an tum. Joint NGO te thilphut chungchang hi Zirtawpni khan MNF, MPC leh ZNP party hruaitute chuan an sawiho a, 'tlawmngai pawlte nen inep chu a tha lo e' tiin NGO te duhdan anga kal mai nise an ti a, an thutlukna hi Zirtawp zan dar khan Joint NGO Chairman Lalbiakzuala hnenah an thlen nghal a ni. Party pathumte thil thlen chungchang ah hian Joint NGO lam chuan meeting koh nan hun a tepter tawh bakah ruahmanna thui tak lo kalpui tawh anih avangin AMC pisa kai tur dan chu a hmaa lo rel tawh angin kaltlang pui phawt nise, Thawhtanni chawhnu lamah party aiawhte nen hian Thuampui Branch YMA Committee room ah inbiak nise, thu tlukna a zirin pisa kai tur dan hi tihtawp nise an ti nia thudawn a ni. Zalen palaiin a biak naah Central YMA President leh Joint NGO Chairman ni bawk Lalbiakzuala chuan party aiawhte chu a inah an lo len thu leh an inkawm thu a sawi a, 'Keimah chuan thutlukna ka siam mai theih loh thu ka lo hrilh a ni,' a ti. CYMA President chuan naktuk AMC pisa kai tur dan naah hian CYMA OB, CEC, Sub-Committee te bakah Aizawl hmarlam Branch te duty turin an ruat tih a sawi a. Anni bakah hian zirlai pawl leh midang pawh an duty ve dawn tih a sawi bawk. AMC Chairman Zarzoliana chuan Joint NGO te duhdan anga sawrkara thu thlen chu an hreh lo tih leh an thu a nih loh thu Zalen palaiin a kawm naah a sawi a. "Joint NGO te thilphut chungchang hi hmanni lawkah kan sawiho tawh a, mahse a tlang loh avangin hun remchang dangah sawi leh nise kan ti a, ngaihtuah leh kan tum lai tak a ni," a ti. AMC Chairman chuan Joint NGO te chu an do lo tih sawiin, "NGO te thilphut hi kan duh lo bur a ni lo a, mahse Board of Councillor meeting in a pass ngai a ni a, mahse a tlang loh avangin eng mah kan ti thei lo a ni," a ti bawk. Thawhtanni ah Pisa kai an tum leh tum loh zawhna chhangin AMC Chairman chuan, "Office kal hi kan duty a ni a, kan kal theilo anih erawh chuan kan sawi thei lo," a ti bawk. Party 3 hruaitute ruahman angin AMC hian NGO te thilphut ngaihtuah tur hian special meeting koh an tum a, tunkar hian meeting hi neih hman tum a ni. Joint NGO te hian AMC Licensing Regulations ah hian Mizo Tribal Certificate, EPIC of Mizoram leh Permanent Residential Certificate te thil tel an phut a ni.