ZALEN March 12, 2026: ZPM Thalai General Headquarters chuan Bawngkawn Brigade-a AMC Playground chuan vawiin khan a hmunah an tlawh a, thil fel lo tam tak a awm ngeiin an hria a, Rs 5,04,36,000/- hman ralna an hmuh loh bakah MNF Party worker an duhsak zawng 18 hnena Aizawl thalaite infiamna rotling tur sem sawm a ni chu an dem thu an tarlang bawk.

March 12, 2026-a Assembly Budget Session kal meka Lunglei West bialtu T. Lalhlimpuia zawhna UD&PA Minister-in a chhannaah Bawngkawn West-a Brigade Field, AMC Playground ni ta a sum senso zat hi Rs. 5,04,36,000/- a ni a, ZPM Thalai chuan a hmuna an tlawhnaah Rs. 5 crore chuang hman ralna tur an hmu lova, RTI hmanga AMC a zawhna chhannaah erawh Contractor 16 te sum senral Rs. 4,20,87,000/- niin, AMC-in RTI hmanga chhana an pek hi rinhlelh awm an ti bawk a ni.

Brigade field an tlawhnaah hian Brigade field/AMC Playground hi a nih tur ang a nih loh zia an finfiah an ti a. March 21, 2022-a hawn tak, Lengpui MSSC Sports Complex-a Synthetic Astroturf Football ground, Cheng nuai 500 senga sak nen tehkhin chi pawh a ni lo a, Lengpui khelmual siamna aia Rs. 46,000/- a an seng tam zawk chunga Artificial Turf pawh phah loh, zim zawk bawk si, inkhelhna tlak lohva an chhuah hi ZPM Thalai chuan an dem tih an sawi bawk.

Brigade field awmna Bawngkawn West venga an Local Council Chairman pawh thil chinchang zawhfiah a ni a. Local Council Chairman Hmingthanzaua pawhin Brigade Field chu siam puitlin hun an nghahhlehzia leh Rs. 500 lakh (cheng nuaih zanga) chuang sen a nih tawh hnuah hmantlak loh a, a zuzi ta chu pawi an tiin Vengchhung mipui pawh an lawm lo tih a sawi. Bawngkawn West veng tan mai nilo, veng thenawmte thlenga thlakhlelhawm, Brigade field sum siamna atana hmang tute hi an dem thu a sawi bawk. Tun hnaia Inter Village Football Tournament lo awm tur atana Bawngkawn West team inbuatsaih tur te pawh veng hla tak tak panin sum chawia football field hmang hawhin football an practice thin thu leh an rilru pawh a nat thar fo thu ZPM Thalai te hi an an lo hrilh niin an sawi.

He khelmual hi a nihna angin tih puitling ni se, Mizo ṭhalaite, a bikin Aizawl thalaite chhawr tur infiamna hmunhma pawimawh tak a ni a, MNF kaihhruai AMC-in political party worker inhlawhna mai maia an hmang leh, hna ṭha thawh aia mi 18 hnena an sem sawm hi Aizawl thalaite hmuhsitnaah kan ngai a, ṭhalaite infiamna hmunhmaa inhlawh an lo ching hi MNF kaihhruai State sawrkarah mai ni loin, MNF kaihhruai AMC-ah pawh a lo awm lehzel hi a vanduaithlak an ti.