ZALEN May 21, 2026 : ZPM Thalai General Headquarters EOB te chuan vawiin khan Chief Minister Lalduhoma chu a Office-ah kawmin AMC Sport Complex (Brigade Field) leh NH-06 kawngpui siamthat mek chungchanga ZPM Thalai General Headquarters hmalaknate sawipui a ni a, Chief Minister Lalduhoma chuan Mizo thalaite hmakhua ngaia AMC Sport Complex siamthat chungchang ZPM Thalai ten kan bawhzui chu lawmawm a tih thu leh hemi atan hian ZPM Sawrkar chuan nuai 500 a dah thu a lo hrilh an ti.

Chief Minister Lalduhoma chuan “ZPM chuan siamthat hna kan thawh rualin hmasawnna thar kan thlen tir mek a, AMC Sport Complex (Brigade Field) pawh inkhelhna tlaka siam that ngei kan tum a, chumi atan chuan sum pawh nuai 500 kan dah a, he field hmang tangkai tur kan Mizo thalaite pawhin an nghakhlel hleiin ka hria a, ZPM Thalai ten Brigade Field siamthat a nih theih nana hma in la hi a lawmawm hle mai,” a ti.

NH-06 chungchangah Chief Minister chuan,"Kawngpui tha kan neih theihna tura sawrkar leh mipuiten theihtawp kan chhuah hona a zarah hmasawnna kan hmu chho zela, furpui a lo thlen apianga kumtin kawngpui chhia vanga harsatna kan tawh thin te pawh kumin chuan kan pumpelh thei dawnin a lang a, NH-06 chungchangah pawh NHIDCL leh MoRTH te nen thawhona tha tak kan nei a ni,” a ti.