Aizawl April 13, 2024 : Mizoram Car Rental Association (AMCRA) chuan SCERT Deputy Director Florence Lalrinpuii chu lehkha thawnin ngaihdam an dil a, hemi chungchangah ngaihdam dil tur hian Mizoram Commercial Vehicle Union chuan Palai hna thawkin vawiin chhun dar 12;30 khan an lenchilh a, Florence-i hian Pathian hmingin a ngaidam tih a chhungkhat laina te social media kaltlangin a hrilh.

Florence-i ngaidama thu hi anni pawhin TV leh Media dangah lo tih darh turin hma an la dawn tih an sawi bawk a ni.

All Mizoram Car Rental Association lam chuan a hnuaia mi ang hian Florence-i hi ngaihdam an dil a, lehkha hi an pawl letter head-in an thawn a, K. Lalrinchhana, Gen Secretary, AMCRA chuan a hming a ziah hnan a ni.

"Keini All Mizoram Car Rental Association (AMCRA) Executive Committee Meeting chuan ngun taka kan ngaihtuahin, April 4, 2024 (Ningani) Dar 7:00 Pm-a Hotel Regency-a Assembly kan neihnaah leh Press Release kan siamah thu kan lo hriat danin MP (Lok Sabha) Election 2024 lo awm tura TBC Car Rental hman a nih chungchangah thu belhchian dawl lo kan dawn avangin i lo inrawlh angin i hming mawilo takin kan pho chhuak a. Kan thu hriatte thu belhchian dawl lo a nih tih kan hriatin pawi kan ti hle a. Social Media-ah i hming mawilo taka kan lo thehdarh avangin khawngaih taka min ngaidam hram turin kan ngen a che.

He kan ngenna che hi khawngaiha min lo pawmsak a hma min laksak loh turin kan ngen a che." tiin an thawn a ni.