Aizawl: All Mizoram Farmers Union (AMFU) chuan September 28, 2018 hian Chanmari kawn atanga Vanapa hall thleng Mizoram kuthnathawktute chhanchhuahna kawngzawh neih an tum. Nimin khan Aizawl Press Club-ah chanchinbu mite kawmin AMFU General Secretary Zion Lalremruata chuan kawngzawh an tum chungchang hi a sawifiah a, “Mizoram sawrkara hun rei tak kan lo nawr tawh Land Reform leh Agriculture Marketing System chungchang sawrkarin a bawhzui that tawk loh avang te, sawrkara kan thilphut tihhlawhtlin ngei a nih theih nana nasa zawka nawrna atana kawng-zawh hi kan buatsaih a ni,” a ti. AMFU General Secretary chuan Land Reform leh Agriculture Marketing System chung -chang chu vawi tam tak sawrkarah an thlen tawh tih sawiin ultimatum hial pawh an lo thehlut tawh tih a sawi a; mahse, beiseina sang taka an nei chunga a bawhzuina lam a awm loh avangin ni 11.9.2018-a AMFU General Headquarters executive meeting chuan kawngzawh chu an rel tih a sawi a. “Kan ram rorel tura kan thlantlin, kan ram hruaitute hian ram siamthatna tur leh intodelh tura hmalak hi an tum lo tih a chiang hlein kan hria a ni,” a ti bawk. Zawhna chhangin sawrkarin Land Reform a tihpuitlin loh chhan chu thuneitu zingah ram nei ngah deuh deuh an tam vang nia a rin thu a sawi.