Aizawl: All Mizoram Farmers Union (AMFU) chuan sawrkarin NLUP dawng tur a thlan dan chu tha lo an tih thu an sawi. Nimin chhun khan an office, Venghluiah press mite kawmin AMFU hruaitute chuan sawrkar flagship programme NLUP dawngtu tur thlan kawnga eptu MLA te thlauhthlak an ni chu democracy kalphung nilo hle a an hriat thu an sawi a. “Ruling mi leh sa nih vang chauha NLUP hi dawn theih anih chuan a hlutna a bo vek dawn a, chuvangin a manual ang takin kalpui se kan duh a ni,” an ti. AMFU General Secretary Zion Lalremruata chuan, “Mizoram sawrkarin market mumal tak a kalpui loh avangin kuthnathawktuten harsatna kan tawk a. Kan harsatna sukiang tura APMC Rules siam tura tih pawh vawiin ni thlengin siam a la ni lo a. Hei bakah Land Reform kalpui tura kan ngenna pawhin awmzia a nei lo a. Heng thil pahnihte hi August 2018 ral hmaa peih ngei turin sawrkar kan phut a ni,” a ti. Sawhthing hralhna chungchangah vawi tam tak sawrkarah an thlen tawh chungin chhanna an hmu ngai lo niin AMFU General Secretary chuan a sawi a. “Tun hnaia sawhthing buaipuitu committee a AMFU min ruatna hi pawm chi ah kan ngai lo va, banna kan thehlut a ni,” a ti. AMFU Treasurer R.Laltluanga pawhin, “Sawhthing hralh chungchanga ruahmanna hi nikum lama lo ruahmanna lo siam lawk vek tur a ni a, tuna ruahmanna han siam leh hi ngaihsak dan awmze nei lovin min ngaihsak ni berin kan hria a ni,” a ti bawk. AMFU hruaitute hian agriculture link road siam thin pawh fur lai pawha kal theiha siam ni tawh se an duh tih an sawi bawk.