Aizawl March 29 : Vawiin khan BJP State President Vanlahmuka chuan Press Conference a ko a, Union Home Minister Amit Shah rawn kal tur chu tu emaw party koh luh ni lovin Mizorama BJP sawrkarin hmasawnna ruhrel a din te hawng tur leh hnathawh hmachhawpa Lungphum phum tura rawn kal tur a nih thu a sawi.

Hmuaka chuan Union Home Minister-in Assam Rifles hmun tura hnathawh a rawn hawn tur chuchangah chu tu emaw koh chhuah lam a ni lo a ti a, BJP chuan hmasawnna hnathawh te chu chak thei ang ber umzui chu a tum ber a nih avangin tunah pawh hian chumi hnathawh chu rawn bawhzui a, an rawn hawng a ni mai, niin a sawi. AR te hi an insawn luh nghal a rin leh rin loh Press mite zawhna a chhan naah Hmuaka chuan, "Kan lo thlir ang chu," tiin a chhang a, tunah engmah sawi theih a nih loh thu a sawi bawk.

Home Minister hian Assam Rifles Battalion Headquarter Complex-a Chenna In, Barrack leh Damdawiin te leh leh thil dang dang hnathawh te, Inkalpawhna kawng te, 2.5 MVA, 33/11 Sub Station bun thar te leh Zokhawsang water Supply Scheme te chu a hawng dawn a, heng hnathawhna atana sum sen hi cheng vaibelchhe 163.237 zet a tling a ni. 

Hei bakah hian cheng nuai 19.88 senna Keilungliah, Champhai tui khuah hawna te, Lianchhiari Run cheng vaibelchhe 10-a sak hawn te, Smart City hnuaia cheng vaibelchhe 119.2 senna Treasury Square-a 'Integreted Command & Control Centre (ICCC) sak hawn leh Bairabi-a cheng vaibelchhe 2.74 senga warehouse sak hawn te a tel bawk. A thil hawn tur te-a sum sen zawng zawng hi cheng vaibelchhe 315.057 sen a ni.

Amit Shah hian hmun ruakah hnathawna tur Lungphum a phum dawn bawk a, chung zinga chuan Assam Rifles chhuahsan tur hmuna sak tur Laldenga Centre cheng Vaibelchhe 193 thawh tur te,  cheng vaibelchhe 2.70 a sak tur Warehouse/Commercial centre, Aizawla sak tur te, West Phaileng atanga Marpara inkar kawng cheng vaibelchhe 17 a hnathawh tur te, Vaibelchhe 781.85 senna tur NH-502A Zorinpui - Longmasu kawngpui siam te, Aizawl Bypass road, Sairang - Phaibawk (package 1) cheng vaibelchhe 329.70 senna tur leh Aizawl Bypass road, Sairang-Phaibawk (Package-3) cheng vaibelchhe 720.72 a siam tur te a tel bawk. Lung a phumna te hi ruahman dan chuan cheng vaibelchhe 2098.97 senna tur a ni thung.