ZALEN April 9, 2026: All Mizoram Village Council Association (AMVCA) hruaitute chuan Village Council ten khawtlang hmasawnna tur atana hnathawhna tur, Rural Local Body Grants (RLB Grants ), 15th Finance Commission atanga an dawng kim thei chu lawmawm an ti.

AMVCA chuan RLB Grants an dawn kim theih nana Chief Minister Lalduhoma, RD&AD Minister Prof. Lalnilawma, Minister, Local Administration Department, Finance Department leh rim taka a chhun a zana thawktu Local Fund Audit a thawktute zawng zawng chungah thinlung takin lawmthu an sawi a. Mizoram hruaitu a lu ber Chief Minister-in VC ten khawtlang hmasawnna tur hnathawhna sum thinlung leh tih tak zeta min veipuina leh hma min lakpuina hi ropui kan tiin lawmawm an ti thu thuthar lawkhawmtute an hrilh.

15th Finance Commission-in Mizoram RLB Grants dawn tur a ruahman 2021 – 2026 chu a sum fai zawngin ₹ 36,200 lakhs (362 crore rupees) a ni a. Heng zawng zawng hi a bo a bang awm lovin an dawng kim thei a, 15th FC hnuaia RLB grants sum dawn tawp ber na tur chu 15th FC period hunchhung ngeiin, ni 28.03.2026 ah khan Mizoram in an dawng a ni, an ti.

Sawrkarin kum hnih leh a chanve chhunga 15th FC-in FY 2021-22 to 2025-26 hnuaia installment kan hmuh zawng zawng chu installment pakua (9 installments) a ni. Chu chu a sum zawng chuan ₹ 32,750 lakhs a ni.

Mizoram chuan RLB Grants chu a vaiin 15th FC-in min ruahhmansak ang ngeiin, installment zawng zawng hmu kim tawh niin, a sum fai zawngin ₹ 36,200 lakhs (362 crore rupees) kan dawng kim ta a ni.

AMVCA chuan Village Council-te lawmman hi kum 2011 hnuah tihpun a la ni leh miah lo a,Chief Minister leh RD&AD Minister te hnenah VC lawmman tihsan sak turin ngenna a thlen a, sawrkar in hma ala mek niin an hria a, hei hi a hlawhtlin hun kan nghakhlel hle a ni an ti a, VC te hlawh hi tuna an hlawh let nga vela tihpun tum niin an hriat thu an sawi bawk. Village Council-ah hian President-in Rs. 1,000, Vice President-in Rs. 900, Secretary-in Rs. 800 leh member dangin Rs. 700 an hlawh a, Tlangau-in Rs 450 an hlawh a ni.