Kum 2024 nipui thleng contract ala nei chungin Ozil chuan a khelh mekna club Fenerbahce a chhuahsan dawn a, a contract chungchangah hian Mesut Ozil leh club thuneitu ten inremna an siam a ni. 

Ozil hian Arsenal atangin kum 2021 January thla khan Fenerbahce hi a zawm a, kum 33 mi Arsenal star hlui hian club beisei a phak lo hle a, Turkish club tan hian season khat leh a chanve a khelh tawhah game 37 chiah lutin goal 9 chiah a la khung. 

Fenerbahce manager Ismail Kartal leh Ozil te inkarah hian inhriatthiam lohna a awm deuh nia sawiin tunah phei chuan Fenerbahce squad lamah Ozil a hming hi a lang phak tawh lo va, hei vang hian Ozil-a pawhin club chu chhuahsan mai a duh ta niin a lang. 

He buaina hi March thlaa Fenerbahce leh Konyaspor inkhelh tuma thleng a ni a, he inkhelhah hian coach hian Ozil chu minute 45-ah lachhuakin Ozil hi a lungawi ta lo a, inkhelh banah an buaina chungchang chu Kartal leh Ozil te hian an sawi dun a, Ozil hian hrem a tawrh phah ta niin a hriat. Tunah rih chuan Ozil-a club zawm tur hi hriat chian a ni rih lova, Turkish club tho Istanbul Basaksehir nen sawi zawm mek a ni.