Premier League champion tura inum boruak a sang tawh a, Manchester City-in Arsenal lakah point khatin hma an hruai mek a, a khawi zawk zawk tan pawh point hloh a hun tawh lo va, Gunners tan phei chuan ‘a thiang tawh lo’ a ni tawp mai.

City hian khelh hmabak vawi li an la nei a, Arsenal-in vawi thum an la nei thung a, khelh khata an tam chunga an la phak loh a nih miau avangin Gunners hi an chak vek a ngai tawh a, chuti chung pawhin City result an ngaihchan tel a ngai tawh.

City boss Guardiola chuan Gunners hi a la dah hniam lo va, an hmabak pathumah chuan ‘hnehna an chang vek ngei ang’ a ti hmiah mai.

Arsenal hian Emirates Stadium-ah Brighton leh Wolves an la mikhual dawn a, hemi inkarah hian Nottingham Forest an tlawh bawk ang.

Guardiola chuan Arsenal hi an chak vek dawn tih a sawi rualin, “Premier League-ah vawi li (anmahni la hmabak zat) khelh a la awm a, a pawimawh tak zet vek a, kan chanvo hi kan hlen ngei a ngai,” a ti.

City hian Pathianni zanah Everton an tlawh dawn a. Merseyside-a an zin chhuak tur hi Premier League inkhel pawimawh ber zinga mi niin champion lai tan Arsenal laka an hmahruaina sawhnghehna remchang a nih laiin 17-naa awm, Everton tan tlahniam lo tura an beihna pawimawh a ni ve bawk.

Thawhlehni zan khan Champions League semifinal-ah Real Madrid tlawhin 1-1 in an inhnehtawk a, Nilaini zanah an mikhual zui ve dawn a; mahse, Europe lam a ngaihtuah lo va, “Everton chiah ka ngaihtuahnaah a awm,” tiin Spanish coach chuan a sawi.

Everton zawhah City hian Etihad Stadium-ah Chelsea mikhualin Brighton leh Brentford an tlawh leh a la ngai dawn a, Premier League nomawi la turin inkhel pawimawh vek a ni.

Everton nen Pathianni zana an khel tur hi Guardiola hian a dawta an khelh tur nen a bichilh deuh avangin a hre thiam lo tih a sawi a. “Mahse, sawn tura tih vel ka tum lo. Kan insiam rem ang. Engnge kan tih theih? Inrinni zana khelha inbuatsaihna tam zawk neih chu kan duh alawm; mahse, heti hi kan ni si,” a ti.

Inrinni zanah hian Liverpool-ah Eurovision Song Contest nghah a nih avangin City leh Everton hi Pathianni zana tih a ni a. An inkhelh zawh atanga darkar 72 pawh tling mang lovah Real Madrid an hmachhawn zui a ngai dawn a, chu chu Guardiola hian a hrethiam lo.

Spanish giants hian Inrinni zanah La Liga-ah Getafe an hmachhawn ve dawn thung a, City aiin darkar 24 velin hun an nei thawl zawk dawn tihna a ni.