Nikum September thla khan World Cup qualify Brazil leh Argentina ten an khelh mek laiin Brazil health official-te chuan England ram lama khel Argentina player-te chu COVID-19 hri leng vanga inkhuahkhirhna dan zawm lova ngaiin khelmual chhungah lutin inkhelh an titawp. Match khelh chhunzawm lovin an tiltiak a, ram football Association ten inkhelh nawn leh kher loh dil mah se FIFA Appeal Committee te chuan an ngenna hnawlin an khelh nawn tir dawn.

Brazil leh Argentina te hi kumin a khelh tur Qatar World Cup-ah an inpet tling ve ve tawh a, South American lam qualifing-ah hian Brazil chu pakhatna niin Argentina pahnihna an ni. Football thuneitu sang ber FIFA chuan Brazil leh Argentina te hi February thla khan inkhel tha leh turin an hriattir tawh a, FIFA Appeal Committee chuan an dan anga an ngaihtuah nawn leh hnuah an thu tlukna chu kaltlang pui turin ram pahnihte hi an hriattir tha leh a ni.

An buaina avangin association pahnihte hi FIFA chuan Swiss francs 50,000 ($50,322) an chawitir dawn a, FIFA chuan Brazil FA (CBF) leh Argentina Football Association (AFA) te chu 'Sahimna leh Dan' lama an hlawhchham avangin Brazil chu Swiss francs 250,000 leh Argentina pawh Swiss francs 100,000 chawi turin an hriattir. Hemi chungchangah hian, AFA lam chuan Court of Arbitration for Sport lamah appeal siama zualko an tum thu thla hmasa khan an sawi tawh a ni.

Hetianga an buai mek lai hian Brazil leh Argentina chuan thla leh khian Melbourne Cricket Ground-ah friendly match khel turin ruahmanna an lo siam tawh a, an qualifier match nen hian a innang buai dawn em tih erawh hriat a la ni lo.