Kum 1979 a ni a, Richard-a chuan hmuhnawm ti takin TV-a hmeichhe tennis final khel a en a, tichuan match an zo lawmman an sem ta, Romanian player Virginia Ruzici chu champion-in US dollar 40,000 a dawng a, US $4,000 chu Richard-a kum khat chhunga a sum lakluh zawng zawng aiin a tam zawk a ni. 

Tichuan, Richard-a chuan ngaihtuahna thar nei thutin a nupui kiangah chuan a kal ta a,"Nu-i, tennis khel thiam tur fanu pahnih kan neih belh a ngai a ni," a va ti thawr a, chutih hunlai chuan Richard-a hi kum 37 mi a ni tawh a, tennis chu a khel ngai lo mai nilovin, a khel dan pawh a hre mumal lo. Mahse, beiseina lian tak a nei tlat a, kan fanu te chu tennis khelh kan zirtir ang a, US Open te khelin an la champion ve thei a sin, tiin phur takin a nupui chu a hrilh siam siam a. 

A kum leh June ni 17, 1980 chuan fanu an nei ta tak tak a, a hmingah Venus Williams an sa a, thla 15 hnu September ni 26, 1981-ah fanu dang an nei leh a, a hmingah Serena Williams an sa leh. 

Chung nau piang pahnih chu tunge an nih sawi ngai lovin kan hret vek kha.     An pa duhthusam ang ngeiin a fanu te pahnih chuan tennis chu an zir chho ta a, 1990's tawp lam chuan hmeichhe tennis player lar ve tak an ni chho hman der tawh a, 1999 chuan a fanu naupang zawk Serena Williams chu US Open-ah a champion der ta mai. 

Tichuan, prize money vanga tennis lama rualawt Richard-a chuan a fate pahnih chu Florida hmuna tennis coach Rick Macci-a hnuaiah tennis a zirtir ve ta a. An coach chuan chung naupang pahnih kum 9 leh kum 10 mi chu a hrual chho ta a. A talent neih that zia leh an tumruhna a hmuhin naupangte an nih lai atangin sang tak an thleng dawn tih a hre thei nghal a.        

An coach chuan,"Engtik ni-ah emaw chuan world number 1 an la ni dawn chiang khawp mai," tiin a lo sawi lawk hial a ni. 

Hun a kal zela, 1999, August thla a nih meuh chuan Venus Williams, kum 19 mi chu WTA ranking pathumna niin khawvel huap lawmman 7 zet a dawng der tawh. Serena Williams pawhin US Open trophy paruk zet a lak zinga a hmasa ber turin 1999 chuan a a vaw chhuak ve bawk. A hnu zelah phei chuan Grand Slam singles titles 23 zet lain Margaret Court-i record 1 chiahin a phak rih lo a ni. 

Hemi kum vek hian Venus leh Serena Williams te chuan New York-ah women's doubles title an la a, an hlawhtlinna chu khawvel hriat a lo ni ta.
    A nau zawk Serena Williams hian tennis a khelhna atangin US dollar maktaduai 440 chuang la lut der tawh a ni.