April 2, 2023; Vawiin hi Lal Isua Jerusalema ropui taka a luh ni, Palm Sunday (Tumkau Pathianni) a ni a, Tumkau nen a, fak hla sa chungin hmun hrang hrangah kawngzawh a ni. Serkawn-ah chuan kum 79 mi, Pi Haungaii chuan a puan neih that ber ber te kawngpuiah phahin, kawngzawhte a lo hmuak a, a thil tih chu Tumkau Pathianni pual a Isua a lo hmuahna a ni a, amah chawimawi a faktute inngaihtlawmna nena a lo hmuahna a ni.

Lunglei Serkawn a khawsa Pi Haungaii hian kawngzawh ten an in zawn an thleng dawn tih a chian mai loh avangin, duh viau mah se, puan tam zawk a lo phah hman lo a, a puan dah that ah pawh a neih tha ber ber 5 kawngpuiah a phah a, kawngzawh ten a tir lamah hel deuh mah se, inthlahrung lo a rap turin a ngen a ni.   

"Isua ropui taka Jerusalem a luh ni ah, miin an puan te an lo phah a, chhawl te'n an lo hmuak a, chumi ang a ka lo hmuah ve na a ni," Pi Haungaii chuan tiin, "Lal Isua chawimawi a, amah fak a lo hmuak a, kawngzawhte tan a ni a, Isua chawimawina atan leh amah lo hmuaktute tana ui lo a, ka tih theih tawk a ka lo hmuah ve na a ni," a ti bawk.

Nikum January a a pasal H. Lalzuian a boral san, Pi Haungaii hian BCM Serkawn a Kristian Naupang Pawl' (KNP) te kawngzawhna-ah 'a tih theih tawk' a lo ti a. Khawvel mit atanga thlir chuan 'atthlak' lam pawh a ni thei ang. Mahse, engkim hmutu leh neitu Pathian chuan a ngaihlu em em dawn si a...!

Tichuan Isua hnenah an rawn kai ta a, tin, Sabengtung no chungah chuan an puante an phah a, a chungah Isua an chuantir a. Tin, a kalna tur kawngah chuan an puante an phah zel a.  - LUKA 19 : 35-36

ZALEN WEBSITE MIN LO NGAIHLUT SAK A, LO CHHIAR THIN ZAWNG ZAWNGTE 'TUMKAU PATHIANNI' CHIBAI VEK U LE.