Barcelona lamin renovation an kalpui tur project hi a lian ang reng hle a, £1.3 billion hmangin Nou Camp stadium hi an thuam tha dawn. An mual ngaihhlut em em a an khelh theih loh chhung hian 1992 Summer Olympic Games an thlenna Olympic Stadium chu home ground angin an lo hmang lailawk ang.  

An sawi dan chuan, Nou Camp lama an luh leh hmaa an stadium hman hawh tur 'Estadi Olimpic Lluis Companys emaw 'Montjuic' an tih mai luah hawh nan hian pound maktaduai 17 zet an sen a ngai thung dawn. A seat pawh mihring 99,354 thut theihna chu mi 105,000 thleng thut theihna turin an dawh belh dawn a ni.

An renovate-ah hian a chung an khawih tel dawn bakah a stadium hming pawh 'Spotify Camp Nou' tiin an thlak tawh dawn a ni. Hetia 'Spotify' an telh nachhan chu music stream-na hmunpui atang hian sponsorship thahnem tak mai £237 million hu inremna an neih vang a ni. 

Xavi leh a pawlte hian 2022-23 season chhung chu Nou Camp lamah hian an khel theiin a rinawm a, an sak zawh meuhah chuan season tinin cheng maktaduai tam tak an lakluh belh thei thung ang. A cheithat dan tur ruahmanna an neih hi club president Joan Laporta chuan a tichiang tawh a, Barcelona city council lam pawhin an pawm tawh bawk.

Barcelona City Council-a deputy mayor Jaume Collboni chuan,"Kan khawpui-in Olympic Games kan thlen kum 30-na cham lawmna tha ber niin ka hria. Kan stadium-a Barcelona an rawn lut tur hi kan lawmin kan lo welcome takzet a ni," a ti.