Ramchhana Hmar
Phuaibuang

Tehna hrang hrang a awm a, tehna zawng zawng laka fihlim mihring hi a awm theih lo va; mahse, tehna thenkhat kan hman tlanglawn leh langsar tak tak lak atanga inteh pass erawh a theih a, mi te ber atanga a lian ber thleng hian kan hriat leh hriat loh lam chu thuhran nise tute pawh hi teh vek kan ni a. Keini’n kan pass em tih lam aiin min tehtute lak atangin kan pass em tih hi a pawimawh zawk a, chu tehna kan sawi tum ber chuan mi thenkhat teh ngun bik a nei a, tehtlin an harin a tehtute tan pawh teh thiam an ngai hle mai. Chung mite chu tu dang ni lovin politician kan tihte ram hruai hna thawk mek leh thawk tawhte, lo la thawk turte nen lam hian kan teh vek a. An tling em tih erawh mipui chhannaah a innghat thui hle.

Football-ah chuan club hotuten an club-a khel tur player an lei thin a, player lei tur zawngtu tha neih a pawimawh hle a, a tlangpuiin kum upate hi chu man to takin an lei lem lo va, a thlawna lak luh emaw, an lei a nih pawhin a man tlem zawk leh hlawh pawh tlem zawk hlawh turin emaw inremna an siampui thin a, club tana theihna a hlan dan turte fan-te tana club tan tinuam thei khawpa theihna nei a ni em tihte pawh thui tak a hmuh lawk theih a, chuvangin player lei chungchangah club-te an fimkhur hle thin. Naupang zawk leh hmabak eng tak nei, an nih piah lamah theihna sang tak nei te, an club khel meknaah eng anga tha nge sulhnu an neih tih te thlir chungin club chuan player an lei nasain an en thlithlai nasa bik hle. Hetiang deuh hian kan rama politician-te hi rem lo chung chungin tehkhin dawn ila, Football ang lo takin politics-ah chuan kum upa lam kum sawmsarih val pawh an la khel tha thei viau mai, hei hian naupang zawkte tan luhchilh ve dawn pawhin kawng an dang ping thui thei hle. Politician thenkhat chu ram leh hnam tan hnathawh kawr min dila kan pek pawhin kalchhuakin an thawk peih meuh tawh lo, thu chunga thutthleng vir thei ban vuan chungin an thawk peih tawk emaw tih mai turin hnathawh kawr an hak chiah hian an tha a zuai ta thin a, hei hi kan ram thanmawhbawk lian tak a ni.

Football ang deuhin kum upate hi chhuahtir ngam ila, kum upate pawhin naupang zawkte ken nachang hre thar sela, thalai zawkte kan party-a kan seng luh a hun a, thalai zawk an nih mai piah lamah, lehkhathiam, tunlai chhuak, an nihna avang pawh hian ring ngam ila, hmabak êng takin a lo hmuak a ni tih hi kan hriatpui a hun tawh tak zet. Tin, mipuite pawh hian kan ram hruaitu tura lo inpe nazawng hi kan party-a an lo luh avang hian hmu tha vek kher lo ila, eng anga mi tha nge a nih tihte hi i chik thar ang u. Field chhunga player 11 an pawimawh ang chiah hian kan ram rorelnaa MLA 40 leh Aizawl Municipal Corporation-a councillor 19-te hi an pawimawhna hi a inang a, Field chhungah player pakhat a lo khel tha lo a nih chuan awlsam takin a aiawh tur a thlak theih mai a, ram hruaina hnaah chuan MLA emaw, Councillor, LADC member adt., te ang hi chu awlsam taka thlak theih an ni ve lo va, kan fimkhur a ngai hle. Tunah pawh AMC councillors kan thlang dawn a, kan thlan tlinte hi an dam a nih chuan an term an hman zawh angai a. Football anga awlsam taka a tha lo lai thlak zung zung theih a ni lo va; chuvangin, mipuite hian uluk takin kan khawpui enkawltu tur municipal corporation-a councillors thlanna kan neih turah hian ngaihtuahna i seng ang u.

Municipal corporation kutah hian kan khawpui hi a innghat nasa hle a, councillor chak leh viak tha pawh a hriat khawp mai, eng party pawh nise inthlan a hnaih avanga a thlawna sem ching leh thil ho tete sem kual thin mi hi kan khawpui hmasawnna atana mi pawimawh leh kan mi mamawh chu an ni lo chiang sa a, khawpuia cheng, mi puitling vote neithei chin chuan mi tha leh kan tangkaipui theih mite hi i thliar thiam ang u.

A luhchilhna a rei tawh tih lam aiin eng nge a tihtheih tih hi a pawimawh hle mai, chutihrualin rei tak politics lo khel tawh mi tha em em pawh an awm a ni tih hria hria ila, football club-ten an club hmakhua an ngaih avanga player, thiam leh naupang zawkte an lalut ang deuh hian kan politics field-ah hian tun lai chhuak lehkhathiam leh thangtharte lalut ila, rorelna fawng vawntir ang u. Kan ram leh khawtlang, kan khawpui kan hmangaih a nih chuan heng a chunga kan sawi tun lai chhuak thalaite hi ringngam ila. Tute pawh an sulhnu en chung leh hmathlir nei tha an ni em tihte ngaihtuah ila, kan hmabaka hnathawh tur awm a hlen zo angem tih ngaihtuah chungin hnathawh kawr i haktir thin ang u.