Aizawl May 11, 2023 : Vawiin khan I&PR Minister Lalruatkima, MNF Adviser chuan Saitual Jail Quarter-a awm mek Manipur atanga raltlante a tlawh. Zofate Jerusalem Mizoram-ah raltlante thlangmuang taka awm turin a chah a, an tawrhna chu an tawrhna a nih thu leh an natna pawh an natna a nih thu a sawi.

Ruatkima chuan he hunah hian Zofa hmun hrang hranga chengten harsatna an tawh chungchang sawiin, "Kan unaute an ni a, an natna chu kan natna a ni a, an tawrhna pawh kan tawrhna a ni. Chutiang bawkin an hlimna leh lawmna pawh kan hlimna a ni. An kiangah kan ding tlat dawn a, kan kalsan lovang," a ti a. "Zofate Jerusalem, Zoramah hian kan raltlante pawh thlamuang takin awm rawh u," a ti bawk. 

Lalruatkima chuan, "Kan unau Manipur, Burma leh Bangladesh-a mite'n harsatna an tawk mek tih kan hria a. A pawi kan ti tak zet a. Mizorama rawn raltlan mek te a hnam angin kan lo dawnsawn a pawimawh hle. Sawrkar, Kohhran, NGO leh mipui kan tanrual a, thu khat vuaa kan lo buaipui mek te hi a ropui ka ti tak zet a ni," a ti.

MNF Adviser chuan, "Zofate hi India, Burma leh Bangladesh-ah te thendarhin kan awm a. Hei bakah hian India ramah pawh State hrangah thendarh kan ni a. Zofa thendarha awmte rorelna pakhat hnuaia awm hi kan nghakhlel em em a, Pathian engkim tithei zarah chu hun chu Zofate hian kan chuangkai ngei ang tih ka ring tlat a ni," a ti bawk.

I&PR Minister chuan, "An sahimna zawnga Mizorama rawn raltlan mek kan unau te, an mahni in leh lo ngeia hlim taka an let theih kan duhsak a. Chutih rual chuan an himna duha raltlante kan theih ang tawka chhawm dawl hi Zofa zawng zawngte mawhphurh a ni," a ti. "Assam nen kan ramri a buai a, silai hial a puak a. Assam-in min dan chah vek lai khan, 'Ei tur kan neih chhung chu in nghei bik lovang,' min ti a. Chutianga min titu kan unaute tuamhlawm hi kan bat a ni. Chutiang chuan min ti lo pawh nise, kan chipuite tuamhlawm hi kan bat a ni tho tho a ni," a ti bawk.

"Pathianin Mizorama remna leh muanna min pek te, sawrkar tha tak kan nei te, Chief Minister Nationalist tak kan neite hi, Pathianin Zofate kuahkhawm nan a lo ruahman lawk niin ka hria a ni," MNF Adviser chuan a ti bawk.

MNF Adviser-in raltlan a tlawhnaah hian General Secretary VL Krosshnehzova leh Saitual Sub Hqrs. hruaituten an tawiawm a. Raltlante tan hian Lalruatkima chuan ₹20000/- a hlan nghal a ni.