ZALEN April 5, 2026: Mizoram Electricity Regulatory Commssion (MZERC) chuan April 1, 2026 atanga hman tan turin êng chhit/hman man a bithliah fel a. Mizoram sawrkarin power-a sum indaih lohna Rs. vaibelchhe 151.51 a tumsak theih dawn avangin kum thara êng chhit man chawhrual chu unit khatah Rs. 7.65 a ni dawn.

P&E Deptt.-in kum thar 2026-27 chhung atan ARR leh tariff bithliahsak tura an dilna hi March 19, 2026 khan Mizoram State Advisory Committee meeting-ah sawiho a ni a. Hei bakah tariff petition chhungchangah hian March 20, 2026 khan Aijal Club-ah public hearing neih a ni a, mi pahnih hnen atangin rawtna leh sawiselna awm leh P&E Department-in an chhanna ngaihthlak a ni. 

P&E Deptt hian kum 2026-27 chhunga power supply enkawl nana revenue sum mamawh (ARR) Rs. vaobelchhe 761.15 bituksak turin commission an dil a, hemi hmuchhuak turin kum 2025-26 chhunga tariff hi tisang lova sawrkar kum 2026-27-a hman chhunzawmin sum mamawh hmuh phak lohna chu Mizoram sawrkarin subsidy Rs. vaibelchhe 175 emaw, commission-in ARR a bituksak atanga 22.99% emaw, heta a tlem zawk zawk hian a phuhruksak dawn tih an sawi a. An dil ang chuan eng chhit man tur hi chawhrualin unit khat man Rs. 11.38 a ni. 

MZERC hian P&E Deptt sum mamawhna te a zir chian hnuin ARR atan Rs.706.37 Cr a bituk sak a, hei hi kawlphetha hralhna atanga hmuhchuah tur a ni. Commission chhut danin tariff hman lai mek hmanga Mizorama power hralhna atangin kum thar 2026-27 hian Rs. vaibelchhe 423.043 leh kawlphetha hman bang ram pawna hralhna atangin Rs. vaibelchhe 131.82 an hmuh theih beisei a ni a, hei hi avaiin Rs. vaibelchhe 554.86 a ni.

Hei hian Rs. vaibelchhe 151.51 (i.e. 706.37 – 554.86 = 151.51)-in ARR a phuhru zo lo a. A phuhruk phak lohna zawng hi sawrkarin subsidy a pek sak theih dawn avangin tariff hman laia êng chhit man hrang hrangte hi kum 2026-27 atan hmang leh turin commission-in thutlukna a siam a, tariff hman lai tihsan a ni lo. 

Kum thar FY 2026-27 chhunga Mizorama-a consumer te kawlphetha hman zat tur hi 553.14 MU ni turin chhut a ni a. Sawrkar kum 2025-26 tariff hmangin P&E Deptt.-in kum thar hian consumer te hnen atangin revenue Rs. vaibelchhe 423.04 hmu thei turin beisei a ni a, a pum puia chawhrualin kum thar 2026-27 chhunga unit khat man tur chu Rs. 7.65 a ni.

Kum 2025-26 aia kum thar 2026-27 chhunga consumer-te kawlphetha hman zat hi tlem zawk turin chhut chhuah a nih avangin kum thara revenue hmuh tur pawh hi 2025-26 chhunga Mizorama consumer-te atanga hmuh beisei zat aiin Rs. vaibnelchhe 25.89-in tlem zawk turin chhut a ni.

Tariff order thar hi March 25, 2026 khan siam a ni a, kawlphetha April 1, 2026 atanga hman man chhutna tur a ni.