April 29 atangin Pro Volleyball League khel tan dawn

ZALEN, Apr. 06, 2025: April 29-ah Pro Volleyball League vawi riatna khelh tan a ni dawn a, Mizoram volleyball inelna sang ber hi May 23-ah hmeichhe inelna final-in a tuk, May 24-ah mipa inelna hmawrbawk a ni ang.

LPS Arena, Falkland-ah mipa team ruk leh hmeichhe team thum an inel dawn a, zan dar 8 atang vekin inkhel vawi 22, mipa tum 18 leh hmeichhia vawi li a awm dawn a ni.

Season kal mekah Pro Division inelna vawi hnih buatsaih a ni tawh a, Thutak Nunpuitu Team (TNT)-in hma an sawn tih lantirin Tuichangral nen trophy pakhat ve ve an la.

Hetih lai hian season tir atanga Pro Division mipa team paruk zinga tel, Durtlang North leh Chhinga Veng Spikers-in harsatna an tawk a, kum an tluan zo lo.

Thla liam ta khan Pro Division inelna, MVA Cup, Lungleiah neih a ni a, Durtlang North leh Chhinga Veng an tel loh avangin Pro Volleyball an khel thei dawn lo va. An hmun ruak hnawh khah nan April 1 atanga 3 chhungin Tuikual Indoor Stadium, Aizawlah playoff buatsaih a ni a, team pathum inel zinga sang ber, Anastasia Electric Veng leh pahnihna, Hunthar an tling a, Dinthar an tlang zo lo ve thung.

May 31, 2024 khan final-ah Huntharin 3-1-a Tuichangral hnehin a vawi thum nan Pro Volleyball mipaah an champion a; mahse, inrelbawlna lamah harsatna an tawh avangin season tharah division sang berah an awm zui thei lo va. Chutih laiin season tawp lamah hun tha neiin Pro Volleyball title humhim thei turin an kir leh dawn a ni.

Pro Volleyball hmasa ber, 2015-16 champion Anastasia an kir leh bawk a, 2022-23 champion TNT leh a vawi khat nan Mizoram inelna sang bera champion tuma bei mek, Tuichangral bakah a tum khat nan Pro Volleyball-ah tun season-a kai thar pahnih, Khawbel leh Sihphir an inlan dawn.

Kum liam ta khan Pro Division-ah hmeichhe team nga an awm a, tun season-ah pathum inziak lutin kum zawna Pro Volleyball champion ni lai, Luangmual leh team hlun, Bungkawn bakah Diakkawn ni thin Kolasibin champion nih an inchuh dawn a, Pro Volleyball hmeichhe team inelna hi 2017-ah buatsaih tan a ni a, 2018-ah awl lehin tun hi a tum rukna tur a ni.

Tun season Pro Division inelna hmasa ber, nikum October khan MVA Invitation Cup mipaah Tuichangral an champion a, final-ah 3-1-in Chhinga Veng an hneh; hmeichhe final-ah Kolasibin Pro Volleyball final-a an hneh loh, Lungmual laka an tlawmna chhang letin 3-1-in an chak a ni.

Thla liam ta khan Lungleiah chungnung takin MVA Cup mipaah TNT an champion ve thung a, an bitum hneh fai vekin final-ah 3-1-in Tuichangral lakah an chak a. Hmeichhe final-ah set hnih hloh hmasa, Luangmualin 3-2-in Bungkawn an hneh a, Invitation Cup champion Kolasibin final an lut pha lo.

PRO VOLLEYBALL LEAGUE CHAMPION TAWHTE :

MIPA

2016 - Anastasia Electric Veng

2017 - Hunthar

2018 - Hunthar

2019 - Chhinga Veng Spikers

2022 - Durtlang North

2023 - Thutak Nunpuitu Team

2024 - Hunthar

HMEICHHIA

2017 - Power Department Sporting Club

2019 - Durtlang