Aizawl: Village Council leh Local Council inthlan hun chu April thla tirah puan hman beisei a ni tih Mizoram State Election Commission thawktu ten Zalen palai an hrilh. Tuna Village Council leh Local Council dinglai te term hi February 2015 a tawp tur anih laiin March thla chhung atan sawrkarin a pawtsei a, hemi hnu hian April ni 30, 2015 thleng atan sawrkar chuan a pawtsei nawn leh a ni. VC leh LC term pawhsei leh anih chhan hi a tirah chuan Electoral Roll peih hman anih loh vang a ni a, Roll hi peih ni tawh mah se March ni 17 atanga Mizoram Assembly Budget session neih anih dawn avang leh sawrkar kum tawp buai lai nen a innan dawn vangte a ni. VC hi Aizawl district ah 95, Lunglei ah 145, Serchhip ah 49, Champhai ah 108, Mamit ah 87 leh Kolasib ah 52, a vaiin 536 a awm dawn a, seat zat erawh chu siamfel ngai tlem a la awm avangin hriat mai theih a ni hrih lo. Local Council zat 82 ni thin chu Local Council dang pakhat, Tlangnuam Vengthar siam belh anih avangin 83 a awm dawn a ni. Tun tum VC leh LC inthlan atang hian hmeichhiate tan seat hauhsak a ni dawn a, an term kum 3 ni thin pawh kum 5 a ni tawh dawn a ni. VC ah chuan seat 3&4 a seat 1 chu hmeichhe tan, seat 5 ah 2 leh seat 9 a 3 te hmeichhe tan hauh a ni dawn a. Local Council ah chuan seat 5 ah seat 1 leh seat 7 ah seat 2 te hmeichhe tan hauh a ni thung ang.