Aizawl: April 2015 atanga hman tan turin eng (electric) chhit man chu tihsan tum a ni a, tuna hman mek aia eng chhit man thar tur sanna hi a pumpuia chawhrualin 2% vel nia thudawn a ni. Eng chhit man bithliah chungchanga thuneitu sang Joint Electricity Regulatory Commission (Mizoram & Manipur) thawktute hnen atanga Zalen thudawn danin eng chhit man hi kumtin tihsan tur a ni a. Mah se mipui tan phurrit tlem thei ang bera kalpui thin a ni a, mipui ngaihdan hrang hrang lak a nih hnu-ah thlutlukna an siam chauh thin niin an sawi a. Kumin ah pawh hian Power & Electricity Department rawtna ang chuan (rate hmanlai leh rate thar tur) a pumpui chawhruala a sanna tur hi 5.97% anih laiin 2% ah an bithliah tih an sawi. JERC thawktute chuan state dang nen ngaihtuahin Mizoram power hman man chu a tlawm hle tih an sawi a. Thla khata electric unit 200 hmang chin ah hmar-chhak state thenkhat Nagaland ah Rs. 1202, Meghalaya Rs. 750, Manipur Rs.908 ten an chawi laiin Mizoram ah chuan Rs. 698 chauh tih an sawi bawk. Rate thar turah hian Kutir Jyothi (BPL) ah thla 3 chhunga unit 45 hmang pha lo chin tan tihsan a ni lo a, Domestic (normal) ah hian 2.78% a tihpun a ni a, commercial ah 3.78%, public lighting (street light) ah 1.64%, industrial ah 1.29% ah tihpun a ni a, agriculture ah erawh tihpun a ni lo thung. Zalen palaiin a biak naah Central YMA General Secretary Vanlalruata chuan rate thar tur chu an la hmuh ve loh avangin ngaihdan a la sawi thei lo niin a sawi a. "Normal hi kan sawisel lo a, mah se fixed charge sang lutuk thin hi kan duh loh ber a ni," a ti. Tun dinhmunah Mizoram chuan power mega watt 29.85 vel a thar thei (install capacity) laiin mamawh san lai ber (peak demand) lai chuan 100 mega watt vel kan mamawh nia hriat a ni.