ZALEN December 8, 2024 : Chief Minister Lalduhoma chuan, “Tuna Assam Rifles (AR) batallion awm mekte an chhuah huna batallion thar lo awm turte chu Zokhawsang-ah an awm tawh dawn a ni,” a ti.

Nimin zing Hyve Aizawl City Hall-a Centre for Environment & Social Justice (CESJ) buatsaih, AR ram chhunga thing chhiarpui leh zirchianna (Tree Inventory & Carbon Storage of AR Campus, Aizawl, Mizoram) lehkhabu a tlangzarhnaah he thu hi sawiin chief minister chuan, “AR hian DIG chenna leh Khatlaa an range tih loh chu an chhuahsan vek dawn a. January, 2025-ah Chite, Babutlang leh biak in hmunte an chhuahsan ang a, a bak zawng hi April, 2025 hmain an chhuahsan dawn a. AR insawnna atan hian state sawrkar pawhin tih tur kan nei a. Tui, êng leh kawng siam hi kan tih tur niin chhuanlam an siam loh nan hna pawh kan thawk char char a ni,” a ti.

AR chhuahsan ram hman tangkai dan turah thutlukna engmah siam a la ni lo tih sawiin chief minister chuan, “AR ram hman tangkai dan ngaihtuahtu tur committee kan din dawn a, committee hian engtin nge hman tangkai a nih ang tih an la rel dawn a. AR ram chhunga ram neitute pawh an ram sawrkara pe let (surrender) turin kan ngen dawn a, an chhan ngei pawh kan beisei a ni,” a ti.

Environment humhalh pawimawhzia sawiin, “Project reng rengin environment a tihchhiat chuan a sustainable lo a. Project thar kan neih dawnin ram tichhe lo zawngin engtin nge kan kalpui ang tih ngaihtuah hmasak zel a pawimawh a ni,” a ti.

CESJ hian AR ram chhunga thing an zirchiang a. Zirchianna atanga a lan danin AR ram hi 16.9 Ha-a zau niin thing chi hrang chi 480 an awm a, species hrang 80, family 31 leh genera 59 an chhinchhiah a ni.

International Union for Conservation of Nature tehfung atanga tehin riral hlauhawm tak venhim ngai bik thing (critically endangered) chi li an awm a, an riral hlauhthawnawm (endangered) pakhat leh dinhmun ngaihtuahawm (vulnarable) panga an awm.

An zinga 71 hi ramhmul damdawia hman theih leh ei theih chite an ni a. He hmun hian carbon dioxide (CO2e) 5,766.73 bawr vel a hip lut tih hmuhchhuah a ni a, chanvo pawimawh tak a nei tih hmuhchhuah a ni.