ZALEN March 17, 2026 : Tukin dar 7.30 khan Heritage Court, Lammual (Opposite Vanapa Hall)-ah Aizawl Khawpui Chei Tharna Lungphun - Early Bird Projects chu khuallian Chief Minister Lalduhoma'n a phun. Lungphum zawh hian Excavator hmangin kawng hi kutthlak a ni.

Khuallian chuan AR ram chhuahsan tâk mipui kuta awm ta chu ropui a tih thu a sawi a, "Kum 130 chêp takin kan awm a, hunin thiam min chantir a, tunah Aizawl timawitu, tiropuitu a ni dawn ta a ni," a ti. Lammual ram hman dan tur chu Mizoram mipui zawng zawng aiawh; NGO, Stakeholder adt. Advisory Committee te, ruahmannaa hman dan tur ruahman a nih thu a sawi bawk.

"Advisory Committee hian huap loh a nei lo a, sawrkar ruahmanna ni lovin, mipui aiawh kalkhawmte ruahman a ni. 'Final' a ni tawh a, tihdanglam emaw, belh theih a ni tawh lo," tiin Lammual ram cheina tura ruahmanna hi kalpui a nih thu a sawi. "Ruahmanna siam fel vek tawhah Mandir bikah harsatna a awm a, Prime Minister leh Union Home Minister thlengin thu thlen a ni tawha tawngtainaa dil a tul thu CM hian a sawi bawk.

CM chuan, "Vawiin aṭangin kawngpui laih zauh hna kan tan a, a tak ram thleng thuai thuai se kan duh a, chak taka hmalak tum a ni," a ti. UD&PA Minister leh a thawktute an hah tur thu a sawi a, Lalduhoma chuan, "PWD hian a hna tam zawk an thawk dawn a, Sum siamna rilru pu lo a, history-ah a chuang tawh dawn a, kan tu leh fate tân rilru thianghlim tak pua thawk turin ka chah che u. Kan vannei a, Pathian hnenah lawmthu ka sawi a ni," a ti.

Khualzahawm UD&PA Dept. Minister K. Sapdanga chuan thu sawiin, "A petu Pathian hnenah lawmthu kan sawi a. Mipui tan ram kan nei thar hi a lawmawm em em a ni. Mipui kuta AR ram lut ta mai hi tawngṭai chhanna a ni tih loh a har. UT nih hnu kum 50 chhungin party tin ten AR sawn hi manifesto-ah an nei deuh vek a," a ti a.

"Sawrkar tinin thuneitute hnenah an lo nawr thin a, sawrkar ding tawhte thu leh ngaihtuahna seng te an ni vek a. Kan zavaiin he bung thar hi kan lawm a, 'Mizo mipuite tan lungrualna bung thar lo ni se'. Tukina he hun hmangtute kan vanneihzia kan hre tlang ngei ang," a ti bawk.

Aizawl Khawpui Chei Tharna Lungphun-a awm tur te chu : PWD - Heritage Court ₹ 13.18 crore, Kawng zauh (Treasury to Bazar Bungkawn); P&E Dept. - 38 KV Sub-Station ₹ 22.36 crore, Power whitin Lammual ₹ 09.20 crore ; UD&PA Dept. - Vanapa Hall & Park, Aizawl Square ₹ 56.82 crore leh PHED - Reservior ₹ 04.00 crore te a ni.