ZALEN, August 31, 2025: Assam Rifles chuan Zirtawpni khan an thudawn bawhzuia an chet chhuahnaah Champhai district-a Saikumphaiah ral thuam thahnem tak an man.

AR hian Saikhumphai khaw chhunga in pakhat an dapnaah 12 Bore Rifle leh pistol pakhat ve ve leh mu leh puak thei dang thahnem tak an hai chhuak a. In neitu hi an man nghal bawk.

An in dap bul ramhnuai an dap zuinaah ralthuam, silaimu, puak thei leh indonaa hman chi thil dang tam tak an hai chhuak zui a. Heng zingah hian Heckler & Koch G3 Assault Rifle pakhat, Springfield Sniper Rifle pahnih, shotgun pahnih, MA Assault Rifle pakhat, hand grenade pahnih a tel.

Sniper silaimu 75, .303 tracer mu 92, 7.62mm mi 30, Twelve Bore mi pariat, Twelve Bore mu case hnih, 5.56mm mu 91 leh 9mm mu kah tawhna leh la kah lo mu pakhat ve ve an hai chhuak tel bawk.

Puak thei dang an hai chhuah zingah hian Cordtex drum thum, improvised explosive device (IED) siamna hmanrua, puak thei cylindrical packet khat leh PEK packet sarih a tel a. Indonaa hman chi scope pahnih, bulletproof plate pakhat, bulletproof jacket pathum leh kawnghren pakhat an hai chhuak tel bawk.

AR hian heng an ralthuam leh puak thei man leh an hai chhuahna in neitu hi Dungtlanga police department kutah an chhui zui turin an hlan nghal.