ZALEN November 17, 2024 : Aizawl khawpui laili atanga Zokhawsanga Assam Rifles (AR) insawnna atan, April 1, 2025 atanga hman tan tur inremna (agreement) ziah a nih tawh laiin tun dinhmunah an ram chhungah LSC nei mi 61 an la awm nia hriat a ni.

Zokhawsanga AR insawnna tur chungchangah hian October 23, 2024 khan Delhi, Mizoram House-ah agreement ziah a ni a. Mizoram sawrkar aiawhin GAD secretary leh AR aiawhin director general ten hming an ziak a. Agreement ziahnaah Delhi-a awm remchang ZPM, MNF leh BJP MLA-te pawh an tel.

Hetianga inremna ziah a nih tawh lai leh hmalakna a kal chhoh mek lai hian Aizawl khawpui laili AR ram chhungah LSC nei mi 61 an la awm nia hriat a ni a, hetihlai hian sawrkara an LSC surrender mi pariat an awm tawh.

CYMA, MUP, MHIP, MZP leh MSU telna NGO Coordination Committee chuan insawn chhuak thuai se an duh thu an lo tar lang tawh thin a, an hmuna ram (LSC) awmte pawh titawp (cancel) turin sawrkar thuneitute an lo ngen tawh thin bawk.

NGO Coordination Committee chuan, tuna AR hmun chu Mizo mipui tana a awm zui zel theih nan tuna ram pass awmte chu cancel turin ram neitute leh thuneitute an ngen tih thuchhuah siamin an lo tar lang tawh a, AR chhuahsan tur ram chu mipui tana tangkai thei ang bera hman a nih theih nan hma la tura Mizoram sawrkar ngenin, a tul anga sawrkar tawiawm an inhuam thu an lo tar lang tawh bawk.