ZALEN November 24, 2025 : ZPM chhung inkhawmah vawiina neih-ah C. Lalnunnema, Vice President, ZPM General Hqrs & Chairman, Building Committee chuan thu sawiin, “Tukin chhung inkhawma ka rawn din chhan chu, tunlai hian Opposition Party ten dawtin ZPM party nasa takin min chirhtheh a, Social Media lamah an worker-ten theih tawp tak meuh meuh an chhuah a, Zoram mipui leh kan party mite hriat atana Thu Dik puan chhuah hi ka mawhphurhna nia ngaiin ka rawn ding chhuak a ni,” a ti.

ZPM Vice President chuan, “Vawiin hian AR Biak In hmun leh ZPM Party Office chungchanga thu dik chu hetiang hi a ni,” tiin mipui hriat atan hetiang hian a sawi:-

Hman deuh khan Social Media-ah Pu Lalmuanpuia Punte MLA, Adviser to CM leh mi pakhat inbiakna chungchang zeldin thubawl hmangin, ‘ZPM party chuan AR Biak In hmun hi Party Office atan neih an tum’ tiin dawtin ZPM Party chu nasa takin Opposition Party-ten min chirhtheh a. Pu Muanpuia pawhin Party Office chhung inkhawmah a sawi fiah tawh kha. Tun hnaiah hian Opposition Party chuan ZPM Office lei chungchang leh AR Biak In hmun chungchang sawi zawm luiin, an rilru chhe tak chu ZPM min tihmualpho tum nan an rawn puang chhuak leh ta a. Hman atanga politics hri tha lo an vei kha opposition-te hian an la vei reng a, an hri vei Dawt Sawi hi an sim thei lo a nih hi maw. Keini’n politics khelh dan thianghlim leh tha zawk kan zirtir mek laiin a dik lo zawk, dawt hmanga inbeihna a la awm reng mai hi a khamawm ta hle a ni. 

AR Biak In hmun chhuahsan hman tangkai dan turah ruahmanna siamtu, ‘Advisory Committee’-ah ZPM party aiawh turin President-in min ruat a. He Committee-ah hian member kan thahnem khawp mai. Political Party hrang hrang aiawh leh Mizorama NGO pawl hrang hrang ai awh te Pawl 15 zet kan tel a ni. AR Biak In hmun chhuahsan hman dan tur hi Mizoram tan thil pawimawh a nih avangin Pu Lalduhoma kaihhruai Mizoram sawrkar hian uluk takin a ngaihtuah a. Mipui duh dan ang taka thutlukna a awm theih nan, a huap zo thei ang berin Advisory Committee hi a din a ni. 

AR Biak In hmun chhuahsan chhungah mimal leh pawl ho ram neite chu Sawrkar-ah surrender tura ngen an ni a. Kum 2011 atanga Biak In hmun atana Land Lease nei, Mizoram Synod pawh hi ngen zingah an tel a ni. Biak In hmun hi Central YMA-in Court-a a khin zingah tel anga report a awm avangin Pawl emaw, Mimal emaw pass nei, Court-a khin mekte chu Advisory Committee chuan Court thu chhuak ngaihchan ni se, a ti a. November ni 18, 2025 Thawhlehnia meeting-ah chuan Central YMA-in a khin zingah a tel lo nia report a awm avang leh Central YMA-in ziakin Synod hnenah Court-a an khin zingah an tel lo ve, tia an hrilh avangin Advisory Committee chuan Court thu kal lai mek zingah a tel loh chuan Land Lease neitu Mizoram Synod kuta hlan a rem ti a ni. 

ZPM Party hian AR Biak In hmun chhuahsan chhunga Biak In hmun hi Party Office atana neih tumna emaw, AR ram chhuahsan hman tangkai dan tur chungchangah emaw hian, ngaih dan emaw, duh dan emaw kan sawi ngai lo va. Sawrkar-in mipui aiawh zo tura a din, Pawl hrang hrang aiawh telna Advisory Committee ngaihdan leh ruahmanna chu Mizoram mipui tana tha tawkah kan ngaih avangin kan inrawlh ngai lo a ni. AR Biak In hmun chungchang hi ZPM Party te hian Party Office hmun atana neih tum anga min puhna hi dawt a ni a. Zaa zain thu dik lo a ni.

Heti tak maia ZPM Party, Mizoram tana thil tha duhtu Party hi Opposition Party ten dik lo taka min beih takah chuan November 17, 2025 Thawhtanni chawhnu khan Party hruaitu pawimawhten Joint Meeting kan nei a. He meetingah hian EOB te, PAC te, Gen. Secretary rualte kan tel a ni. He meeting hi AR Biak in hmun chungchang sawiho tura koh a ni. Ngun takin kan ngaihtuah a, hetiang hian thutlukna kan siam a, “Assam Rifles Bn. ram chhuahsan chhunga AR Kohhran Biak In leh a ram hi Presbyterian Kohhran hminga Land Lease siam tawh a nih avangin ZPM Party chuan Land Lease neitu Mizoram Synod duh dan anga kalpui ni se tha kan ti” tiin thutlukna kan siam ta a. Nov 17, 2025-a kan meeting hi Party ten official taka Assam Rifle ram chhuahsan chungchang te, Biak In hmun chungchang te kan sawi vawi khatna a ni.

Hetianga thutlukna kan siam chhan hi Pawl leh Kohhrante hi sawrkarin Biak In hmun a pe thin a. Tuna AR Biak In hmun phei chu kum 2011-a Land Lease siam tawh a ni a. Advisory Committee-in AR ram chhuahsan hman tangkai dan tura Master Plan a siam zingah pawh tuna AR Kohhran Biak In hmun hi a huam tel lo hrim hrim a. Central YMA ten Court-a a khin zingah a lo tel bawk si lo va. Chu vangin, Land Lease neitu Mizoram Synod kuta a awm hi a tha ber kan ti a ni. 

Tun hnuah chuan Opposition Party te hian dawt hmanga inchirhthehna hi bansan tawh se kan duh hle a. Thil tha lo tih leh dawt sawi hi bansan tawh se, Thianghlim taka ram leh mipui tana Politics khel turin kan chah a ni. 

ZPM Party hian nikum atang tawh khan Party Office, keimahni ta ngei kan neih theih nan Party Office atana thawhlawm thawh turin party mipui te, Unit leh Block te kan ngen a ni. Vawiin thleng hian Party Office hmun nghet nei lovin, man chawiin mimal in kan la luah mek a. Kumin kum tirah khan Building Committee din a ni a. Kan hotuten Building Committee Chairman-ah min ruat a. Party Office hmun tur lei chungchang chu a hre chiangtu ka ni ve a. Kan meeting hmasa berah Party Officce hmun tur lei nan Bank Loan lak ni se kan ti a. Bank hotute pawh dawr an ni tawh a, In hmun lei tur kan hmuh hunah Bank Loan la turin thutlukna kan siam tawh a ni. Member-ten theih tawp chhuahin Party Office hmun tur hi kan zawng a. Aizawl khawpui laili-ah kan duh avangin kan hmuh chhun te a to hlawm hle a. Vawiin thleng hian Party Office tur hi kan la lei thei lo a ni. Unit hrang hrang te, Block te leh mimal atangin Building Fund atan donation an thawh khawm hi tun dinhmunah Office hmun tur leina tham a la tling lo va; chu vangin, Bank Loan laa Ram lei chu kan tum mek a. Vawiin thleng hian Party Office hmun tur kan la lei thei lo a ni.