Aizawl March 22, 2023 : Dy. Chief Minister Tawnluia chuan vawiin khan Edenthar Community Hall-ah Edenthar Playground sakna tur lung a phum a, chawhnu lamah Tuivamit Kohhran Hall-ah Tuivamit Playground lungphum a phum bawk. Project pahnihte hi Smart City Mission hnuaia thawh tur a ni. AR la chhuah loh avangin Laldenga Cultural centre bultan a la nih loh thu a sawi.

He huna thu a sawinaah Dy. Chief Minister Tawnluia chuan smart city hnuaia hmalaknaah harsatna lian tak a awm tih sawiin, "Natna leh hripui vangin kum hnih chhung chu kan sukuk a. Kum nga chhunga thawh tur smart city mission project pawh kan zo hman dawn lo," a ti. Smart City Mission hnuaia hnate chu central sawrkar atanga viltute nen enhova hmalak a nih avangin project pakhat khawih chhung pawh a rei hle tih a sawi.

Dy. Chief Minister chuan AR Lammual hmar lama sak tur Laldenga Cultural Centre chungchang sawiin, "Smart City hnuaiah Rs 100 Crore dah a ni," a ti a. Assam Riffles an la chhuah loh avang chauha bultan a nih loh dan leh nasa taka nawr zel anih thu a sawi a. April 1, 2023 hian Union Home Minister a lo zin tur thu leh AR awmna tur Zokhawsang camp hawnna leh 'Laldenga Cultural Centre' sakna lung a rawn phum tur thu a sawi bawk a ni.

Smart City hnuaiah project 30 vel kalpui mek a nih thu leh project 10 vel hmachhawp a awm mek thu Pu Tawnluia chuan a sawi a. Aizawl West-I chu university awmna, airport kalkawng, industrial growth centre leh Sarang rel lo luhna tur a ni a. Hengte hi hmasawnna a nih rualin Aizawl khawpui than zelnaah tlak lam chu hmasawnna ruhrel dinna hmun pawimawh tak a ni, a ti.

Tuivamit Playground Vaibelchhe 6.97 Crore- a sak tur lung phumna inkhawmah hian Aizawl West-I MLA Zothantluanga'n thu a sawi a. A bial chhunga hna thawh hmabak a la tam thu te, playground siam tura kawng harsa tak sut tlang a nih dan a sawi bawk.