ZALEN September 13, 2024 : Science Teacher Association of Mizoram (STAM) chuan vawiin khan General Conference Vawi - 37 chu Synod Conference Center, Aizawl-ah an hmang a, School Education Minister Dr. Vanlalthlana chuan General Conference hi a hmanpui.

STAM General Conference rorel inkhawm-in agenda pawm an neih zingah Assam Rifle ten an awmna an chhuahsan tur hmunah Science Park/Science city dah ngei tura hmalak an rel a, Middle School zirtirtu lak naah Science leh Mathematics tan quota siam ni se an ti bawk. 

STAM chuan hmathlir an neih zingah chuan NIT forest clearance an neih theih nan te, Assam Rifles ten Aizawl-a an hmun an chhuahsan huna Science Centre/Science City changkang tak din theih nan te, Thenzawl a Horticulture College chu research institute changtlung tak a nih theih nan te theihtawpin hma an la tih an sawi.

ZMC a Post Graduate zirna a awm theih nan leh Directorate of Science & Technology, Govt. of Mizoram hi Department puitling leh phuisui a nih theih nan te hma an lak thu sawi a ni bawk.

Chawhnu sessionah hian Dr R. Lalengmawia, President kaihhruaina hnuaiah rorel inkawm neih a ni a, Agenda pathum an ngaihtuah a, Middle School Teacher laknaah Science leh Mathematics tan quota siam anih theih nan hmalak ni rawh se, tih an pawm a.

SCERT in science practical zirna tur bungrua a pek thin tawp ta hi chhunzawm a nih leh theih nan hmalak ni rawh se, an ti a, 2013 General Conference-in an lo rel tawh angin Assam Rifle ten an awmna an chhuahsan tur hmunah hian Science Park/Science city dah ve ngei tura hmalak chhunzawm ni rawh se, tih chu palai kal khawm ten an pawm bawk.

Zirtirtu thawk tha State Teacher Awardee lawmpuina an hlan nghal bawk a, Zothanliana (General Secretary) STAM, Govt. Chaltlang H/S leh C Lalhrilliana Govt, Vengthlang M/S, Champhai te hnenah an hlan a ni.

Thlatin chhuak Mizoram Science Journal (2023) atangin Best Article “ Kum 10 daih kawngpui” Ziaktu: Er. H. Laldintluanga leh Best Contribution Award Dr. Laldinpuia te hnenah hlan an ni.