Zirtawpni khan Zokhawsang Assam Rifles hmuna hnathawh kal mek chu a hmunah Addl. Chief Secretary JC Ramthanga hovin Mizoram sawrkar department hotulu dangte nen uluk taka enfiah a ni a. Hnathawh kal meka hmabak la awm te a hma thei ang ber a zawh a nih theih nan leh hna tha leh belhchian dawl thawk turin thawktu EPIL leh Satyam Construction aiawhte chu hriattir an ni.

Zokhawsangah hian Aizawl khawpui chhunga tuna an awm mekna atangin sipai engemaw zat an insuanlut tawh a. COVID-19 hri leng avangin building thenkhat hi quarantine na tur atan a bik a hman nih avangin tum anga chak in la insuan luh theihloh thu Assam Rifles hotute chuan an sawi a. Chutihrual chuan hna thawktu ten chak zawka an thawh chuan heng harsatna hi chu sutkian thuai a nih thu sawiin, tuna la sak zawh loh tlem la awm pawh luah luh thuai theih a nih theih nan theihtawp chhuah tura hriattir an ni.

AR te hi mipui beisei dan leh Chief Minister thusawi tawh atang pawhin insawn mai tura beisei an ni chungin vawiin thleng hian an la insawn thei lo a. An chenna hmun tur la peih a nih loh vanga insawn lo an ni chungin hnathawh hi a muang hle mai a, hemi kawngah hian sawrkar pawhin an insawnna tur hmunhma buaipuitu company te hi chak lehzuala hnathawk tura a nawr a pawimawh hle.

Assam Rifles te awmna hi khawpui laili anih avangin hmun tha lai a ni a, an hmun hi mi tam takin an awt hle. Hetia AR ten an awmchilh chung hian mi thiltithei engemaw zat chuan AR ram chhungah hian LSC/Pass an nei thei tlat mai hi thil mak tak a ni. Mizoram sawrkar hian AR te insawn fel hma ngei hian an chhuahsan tur rama pass awm te hi a chinfel hman ngei a ngai. Dan dik loa pass nei te hi cancel ngei nise, AR ram chhuahsan tur hi mipui vantlang tana tangkai tura hman ni ngei teh se.