ZALEN September 26, 2024 : Centre for Environment and Social Justice (CESJ) Mizoram te chuan a hma atanga an lo tum lawk tawh angin Assam Rifles ram luah mek Lammual leh a chhehvela thing leh nungchate chhinchhiah hna an thawk tan dawn.

CESJ, Mizoram te hian vawiin khan thing chhinchhiah tur khuh hawnna an nei a, thing an chhinchhiah te bakah Heritage Building la awmte chu kutthlak an phal dawn lo an ti a, thing an chhinchhiah chin te chu kutthlak an rem ti dawn lo tih an sawi a, hmasawnna ruhrel din tum pawh ni se, heng thing te hi tichhe lo zawnga hmalak ni se an duh.

Lammual leh a chhehvela thingte chu Aizawl khawpui tana boruak tha tam tap pechhuaktu a nih avangin humhalh tlat a tul an ti a, helai bak hi Aizawl khawpui chhungah Urban Forest a awm chuan loh avangin ngaihhlut a tul an ti bawk.

He hmuna thing chhinchhiah tur researcher te pawhin thing te chu chhinchhiah an nih dawn mai bakah heng thing ten Oxygen an pekchhuah zat te pawh chhutchhuah vek an tum a, thing hi centimeter 10 chin an chhinchhiah dawn tih an sawi.

AR te chhuahsan tur ram hi mipui tan a hman ṭangkai a nih a, thing leh maute ti rem lo zawnga hma la a, MOU ah pawh awm ngei se tih chu CESJ chuan kan duh a. He mi kâwngah pawh hian DIG an sawipui tawh bawk. Sawrkar pawhin mipui tana Aizawl chuap anih theih nana hmang turin an duh a, thing leh mau ti che reu loa Sawrkar leh mimal Building-te a din lohnan CESJ chuan hmalak zel an tum a, he mi kawnga hmalatu chu CESJ chuan thawhpui zêl an tum a ni.