ZALEN Feb 23, 2026: Chief minister Lalduhoma'n Assam Rifles sawn chhuah chungchangah tute mahin credit an lakna tur a awm lo tih sawiin, tawngtai chhanna a nih thu house a hrilh.

Vawiin Assembly budget session-ah memberte zawhna leh zawh belhna chhanga he thu hi sawiin, chief minister chuan, "AR insawn chhuah chungchangah hian tute mahin credit lak kan tumna tur awmin ka hre lo a, Pathian a zahawmin ka hria a, 2024 a State Day of Prayer kan neih ni khan Assam Rifles hoin in horn hi kan lam hawiin rawn dah suh u, in bengchheng lutuk ti zawi rawh u min ti a, kan hnual hle mai a, keinin ring tak taka au a, aw tawp a Pathian fak kan duh a, kan tawngtai rual ta tawp mai a ni. Lalpa he ram hi min pe rawh, he Assam Rifles Lammual hi Nangmah fakna hmun atan kan duh kan ti a, kan tawngtai rual a, chumi kan tawngtai chhanna chu a ni mai ka ngaihdan chuan, tute mahin kan tih, in tih, in tih tur ah ka ngai lo, tunah chuan sawlai hmun saw Pathian fakna hmunah kum tin kan hmang ta a, kan ta a lo ni ta mai a ni," tiin a sawi.

Chief minister chuan union home minister hnenah AR ram sawn chungchangah hian a hresual a nih loh chuan lehkha a ziah awm reng reng a hriat loh thu sawi bawkin, "Lehkha ang zawngin ka kal lo, vawi khat meeting kan ko a, keini lam bakah anni AR an thu bawk a, kan inhnial a mahni tan hmun lam kan sawi mawi ve ve a, meeting hi koh fo chi a nih loh hi, hma kan sawn dawn lo tih ka rilruah a awm deuh a, verbal in prime minister, home minister leh defence minister te ka hrilh a, Army chief in min sawipui bawk a, chaw te kan ei chho a, thingpuite kan inho a, lehkha ziak telloin, thingpui leh chawei hona atanga kan sawifel a ni tawp mai a ni," a ti.

"Kum 2019 ah lehkha a awm a, mahse kha lehkha khan awmzia a nei lo, implement a ni chuang lo a, an chhuak chuang lo a, a hretu zoram mipui kan ni. Khami a nih avang khan kan sawrkar hnuah

lehkha zawnga indeng loin, inkawmngeihna in kan ti a, lehkha awm leh awm chhun chu agreement kan sign kha a ni," chief minister chuan a ti bawk.