ZALEN October 15, 2025: Mizoram State Rural Livelihoods Mission (MzSRLM), Chhimphei Women Poultry Producer Company Limited (CWPCL) leh ZoMeat te chuan vawiin khan an pathum inkar atana tripartite Memorandum of Understanding (MoU) chu Commissioner & Secretary, RD & Administration Department pisaah an ziak. 

He thawhhona thuthlung hian a tum ber chu ar vulhtute- Chhimphei Women Poultry Producer Company Limited leh Mizoram-a sa sawngbawlna (Meat Processing) din thar- ZoMeat inkarah thawhhona nghet leh rintlak tak siam a ni. He thawhhona hmang hian CWPCL hnuaia nu ho ar vulha eizawng te’n hralhna mumal tak an neih a, arsa hmanga eizawnnaah insumdawn tawnna (value chain) tha tak din a nih theih nan a ni.

He MoU hmanga an thawhho dan tur tlangpui te chu:

1. CWPCL-in ZoMeat hnenah an mamawh ang zelin, mumal takin ar an supply thin ang. 

2. ZoMeat hian he inremna an ziahlan angin arsa an lei reng reng, kg ah ₹190 in an leisak ang a, a kalna man kg ah ₹8 an tum zel bawk ang.

3. ZoMeat hian CWPCL hnenah ar puahna khawl a thlawnin an hmantir anga, a enkawl zui thlengin an tum ang.

4. ZoMeat hian arsa an leina man hi a lei atanga ni 5 chhungin CWPCL accountah an thun ziah tur a ni a, CWPCL in ar vulhtute account-ah a lo thun chhawng leh tur a ni.

5. MzSRLM chu facilitator leh enabler niin, CWPCL leh ZoMeat te thawhhona a enpui zel ang a, quarterly review meeting neiin heng pawl pahnih te hi a ko thin tur a ni.