Argentina hi World Cup-ah tum hnih (1978 leh 1986) an champion tawh a. November thla hian an vawi 18 ilanna turinn Qatar lam an pan leh dawn a, a vawi thum nan cup an chawi thei a ngem?

Khawvel pawha lang phak player ṭha ṭhenkhat nei thin mah se, an inenkawl dan fuh tawk lo a awm thin nge, level sang tak an thleng hlei thei lo. La Albiceleste hian an team forward zingah goal thun thei tak tak an nei a, chung zinga thun tam ber mi 3 chu kan han tar chhuak dawn a ni. 

A hnuaia tarlan te hi Argentina chanchina goal khung hnem ber 3 te an ni. Player tarlan zinga pakhat mah hian World Cup an la chawi lo vek bawk. Chu thil chu kumin November thla hian an zinga pakhat chuan a thlak danglam thei a ni.

Superstar Diego Maradona khan goal 29 thunin parukna a ni phak a, Gonzalo Higuain chuan goal 31 neiin pangana a ni a, goal 35 neitu Hernan Crespo chu palina an ni. 

3 Sergio Aguero, goal 41

Sergio Aguero hian a career chhungin club pahnih Atletico Madrid leh Manchester City tan langsar takin a khel tawh thin a. Kum 2010-a Atletico-a Europa League a chawi hnuah City-ah a insawn a, kum 10 chhung zet chu club-ah hian a hmingthang em em a ni. 

Kum 2012-a an Premier League nomawi chawi hmasak ber tur an lak theih nana goal khungtu hmingthang tak a ni a, hei bakah hian tum li zet a chawi nawn leh. Vawi thum chu Pep Guardiola hnuai atangin a chawi a ni. 

Premier League player ropui zinga mi a ni a, City hlawhtlinna tam zawkah pawh player pawimawh a tling phak. Club tana goal khung hnem ber a ni a, match 190 khelhah goal 260 a thun a ni.

Argentina tan 2021 khan Copa America a chawi a, 2014 World Cup-ah pahnihna a ni. Aguero hian nikum khan Barcelona a zawm a, mahse lungchhiatthlak takin hriselna lama harsatna engemaw a neih avangin football a chawlh san a ngai ta. 

2 Gabriel Batistuta, goal 55

Gabriel Batistuta hi Argentina tana goal thun tam ber record hun rei tak chelhtu a ni a, football striker ropui ber zingah mi tam takin an chhiar tel. Kum 1991 leh 2000 inkar khan Fiorentina-ah a hun tam zawk a hmang a, goal engemaw zat a thun bawk.

AS Roma tan pawh khelin kum 2001 khan Serie A nomawi a chawi a, Batistuta hi ball pet na thei tak a nih vanga lar hat a ni. Batistuta hian Argentina tan 1991 leh 1993 khan Copa America trophy pahnih a chawipui a, kum 1992 khan Confederations Cup a chawipui bawk.

Mahse, hliamin a nghawng nasa ve hle a, hliam avangin 2005 hnu kha chuan a khel mumal tawh meuh lo va, charity game-ah te inlan ve zauh zauhin tunah chuan football khawvelah a inrawlh tawh meuh lo.

1 Lionel Messi, goal 90

A ram tana match 164 khel tawh Lionel Messi hi Argentina player tha ber mai ni lovin football player ropui ber a ni tih sawi ngam a ni.

Barcelona a cham chhung kum 2004 atanga 2021 thleng khan football khawvelah an thunun tih hial ngam a ni a, match 778 khelin goal 672 a thun a, assist vawi 303 a nei bawk. La Liga nomawi 10 a chawi bakah Champions League vawi 4 bakah trophy dang thahnem tak a chawi bawk. Mimal chawimawina ngaihhluh ber Ballon d'Or vawi sarih dawng thei awmchhun a ni.

Vanduaithlak takin nikum khan Messi hian sum leh pai lama harsatna avangin Barcelona a chhuahsan a ngai a, Paris Saint-Germain a zawm a, season ropui tak a hmang chho mek. Tun thlasik World Cup-ah Argentina tan captain niin a khel ang. 

Kum 2021 khan Argentina chu Copa America trophy a chawipui a, kum 2014 khan Germany hneh lovin World Cup an chawi phak lo chiah a, kumin hi Messi tana World Cup hnuhnung ber tur a nih dawn vangin World Cup chawi ngei a tumruh hlein a rinawm.