A ni tak erawh ka hre ta mai lo a, October thla, Khuangchawithla Arkaiden zan a ni. Kum khata thla en ber zan a nih pawh kan hriat tlan bawk a ni. Tin, hei mai ala ni lo a, weekend zan a la ni zui zel bawk a, a boruak chu boruak tak a ni ve alawm. Keini chu Aizawl lama rawn hawngin ka pu, Journalist nen chuan a motor-ah kan chuang a, a hnungah thuin kan inkara ban nghahchhanah chuan ban nghatin leh bawp khawkherh chungin thlahdah ang reng tak chuan kan thu a, kan titi malh malh a, a khat tawka zunram thiara kan ding zawk tih bak chu kan tlan char char a, kawng a that vak loh avang chuan duh angin speed erawh a chak thei lem lo thung. Tichuan, sawi tak angin thla pawh chu a êng hle mai a, a chang chuan glass chu ka han down leh zauh thin a, hun kal tawhte pawh ngaihtuah chhuah leh a awl ang reng phian mai. Ka pu nen chuan eng eng emaw kan sawi a, chutia kan titi malh malh lai chuan Aizawl khawpui chu kan lut dawn ta mai a, Melriat kan lo thleng der mai a, tluang takin kan tlan zel a, Aizawl khawpui pawh a lang pe uar ta. Tichuan, Aizawl kawtchhuah, Zampuimanga Thlan bul kan thlen dawn hnaihah chuan thawm ring em em mai hi alo awm a, kei lah chuan mak ti tak maiin ‘Chu eng thawm nge ni ta ngai ?’ tiin ka ka hau mai a, kan driver chuan thalaihoin thla êng an lawm a nih chu a ti mai a, a hmun kan han thlen chuan kawng chhak lamah, kawng kam maiah chuan motor tê chi (light vehicles) hi a lo intlar thui khawp mai a, a inkarah chuan two wheeler a lo ding thluah bawk a, tlan paha ka han chhiar chuan ke pali nei chu 80 vel ka chhiar thei mai a, a kara ding - two wheeler nen chuan za an tling ngei ang, kawngthlang lamah pawh chuan eng emaw zat an ding bawk a, Aizawl khawpui reh duakna tham khawpin kan thalaite helai hmunah hian an tam a ni. Chung motor karah leh zun in leh eng emaw phen remchang lai deuhah te chuan nula tlangval, oh! mipa leh hmeichhiate hian am takin hun an lo hmang mek bawk a, a then laiah chuan zu an lo in bawk a, a kawp tetea awm chu a khat tawkin kan hmu chho zel a, anni lah chuan motor light chhun zauh chu a pawisa der lo mai lehnghal a, ka pu nen chuan hawkdak takin kan thlir chho zel a, ka pu chuan ‘Sodom khua a ni ringawt alawm’ a ti a, nia, hei bakah Sodom khua hi a awm thei dawn chuang em ni le?" Kawngthlang lamah chuan in lian pangngai ve tak hi a awm a, chutah chuan kan thalaite chuan hun an hmang a, chu hmun chu ‘PARADISE’  an ti a ni awm e. Chu hmun atang chuan sap hla hi ring zet maiin an zaitir a, a speaker lah chu verandah-ah an hung chhuak a, a chhungah chuan an ri mur mur bawk a, an lâm ni ngeiin ka hria. Pawn lam hawia sound box an hun chhuah avang  chuan thla êng hnuaia awm chu a hrehawm hmel loh hle mai a, a then an lâm a, a thenin zu an lo in bawk a, zalen tak chuan mitmei veng hauh loin an duh dan danin an awm a ni ber e. Hetiang hian zan tin hun an hmang nge pawh ka hre chuang lo a, Arkaiden zan a nih vanga hmang chauh nge an nih pawh ka hre chuang lo. Hnuhnawm thlir tur ringawta kal ni ila chuan hmuhnawm tur chu a tam hle ang a, sakhaw rawngbawltu mit atang erawh chuan rawngbawlna tur a tam lehzual ngei ang. He kan ram, Mizoram hi Kristian zaah za tih pawhin kan sawi thei tawh lo chu a ni a, kan Kristianna hian hnungtawlh lam kan pan mek zawk chu a ni ta mai si a, kan  Biak In a nalhin a mawi tulh tulh a, a chhungah erawh lut kan tlem telh telh thung bawk si a, Sunday tuka nalh taka inchei a, Bible zakzeh chunga kan kal hi kan Kristianna ber chu a lo nih tak ber hi maw tih thlengin ngaihtuahnaah a awm ta. Kohhran tinte lah chuan camping leh crusade kan uar telh telh a, rei kan daih tak tak thei chuang si lo. Kan sorkar lah chuan zu zawrh a lo phal bawk a, khauh takin a kalpui dawn emaw tih laiin a mantu tur berte lah chuan an lo thih phah ve leh zel bawk a, hmana officer lian tak ei ruk thu kan sawi luih luih pawh tunah chuan rawngbawlin a kal a,  a rawngbawlna chanchin sawiin kan fak leh chiam thung a, ‘UPA’ tia kan sawi a, kan rin em em lah chuan thenawmte ram chhungah a pal ban a phun sawn zel bawk a, uire nu lahin lam a thulh duh chuang hek lo! Engmah ni bik si lo hi lungawi lo takin in ka lut a, ka thin hi a rim tun mai zawk a, tih theih ka neih hre bawk si loin tih tur tamzia ka hre bawk si a, ka huiham leh ngawt mai a, sawi ila, puang ila, hril ila tu-khaw-khain min lo uksak duh awm bawk si lote ka ti a,  vawiin thleng hian ka thinlungah a la cham reh thei lo chu a nih hi. Nia, ka theih tawk chu hetia puan chhuah mai chauh hi a ni si a, Arkaiden zan lawma thalai chevel ka han hmuh hian ka thinlung a hlim thei mawlh lo a, weekend lawma ka thalaipuite awm dan ka thlir hian ka nuih a za mawlh lo a ni.