An thi pawh a ni hran chuan lo va; mahse, inkhel vawi thum ngawt mai an tumpui an hnehtawk a, nomawi an chuhpui lakah tlawmin hmahruaitu nihna an hloh zui a. Arsenal tan Premier League-ah kawng ping angin lang tawh mah se a tawp thlenga phur taka bei turin an harh chhuak leh ta e.

Gunners hi Nilaini zana Manchester City-in an 4-1 an sawp hnuah a vawi khat nan Thawhlehni zanah an inlan a, an London thenawm, Chelsea chu 3-1 a hnehin Premier League chung berah an awm leh ta.

Chelsea erawh Frank Lampard-a hnuaia vawi ruk an khelh tawhah an la tlawm vek thung a. Emirates Stadium-a inkhelah pawh kawng hrang hrangah mual neitu an phak lo.

Minute 34 chhungin goal thum ngawt mai an chhuah hman a, Arsenal captain Martin Odegaard chuan goal hnih thunin Gabriel Jesus-a’n a thun belh bawk a. Blues tan minute 65-ah Noni Madueke chuan si khat a sut then ve a, club legend hnuaia an khelh tawh china goal hnih an thunna chauh a ni.

Arsenal hian point 78 neiin hmahruaitu an ni veleh ta a; mahse, an hnuaiah City chu khelh hniha khel tlem zawk an nih miau avangin an dinhmun a tha ta sawt chuang lo va; Citizens hian khelh ruk an la hmabaka point 18 awmah point 15 an hmuh phak chuan season ruk chhunga a vawi nga nan an champion ang.

Pathiannia Fulham an hneh hnuah khan February 17 hnua a vawi khat nan City-in hma an hruai veleh tan a, Arsenal hian luahlan veleh rihin ni 248 zet a chung berah an awmna a ni ta.

Nomawi inchuhna hi City kutah a la awm rih a; mahse, Odegaard chuan Arsenal-in champion inrinna an la hloh lo tih a sawi.

“City laka kan chak loh khan tute pawh kan na a. Kan thinrimna leh pawi tihna chu tun inkhelah hian a lo lang chhuak a, chak loh fo a ni a; mahse, kan chak lo kha chu kan khelh thin dan pangngai a ni lo va, keimahni kan ni lo va, chu chu a na bik a, a tha lam tihlan ve kan duh a, kan tilang ta a ni,” tiin Emirates-a goal hnih a thun hnuah a sawi.

“Kan bei ang a, kan kal zel ang a, a tawp thlengin kan bei dawn a ni,” a ti.

City hian Nilaini zan hian West Ham an mikhual ve dawn thung a, an chak chuan Arsenal chungah an chuang lehnghal ang.

Arsenal boss Arteta chuan, “Vawi li khelh kan la bak a, a chung berah kan awm mek a. Kan nghak ang a, kan hmu dawn a, kan kutah chuan a awm lo ngei tawh tih kan hria a. Champions League kan khel dawn a; mahse, chu chu kan duhtawk a ni lo. Kan thlen chin hi tawk kan ti lo va, a bak thleng turin kan nawr zel ang,” a ti ve bawk.

City hian Arsenal aiin goal difference an nei tha zawk a, 54 a nih laiin Gunners hi 42 chauh a ni a. Champion lai hi an khel tha tluang a, an inkhelh hnuhnung vawi 14-ah vawi 13 chakin goal 47 an thun a, goal sarih chiah an lamah a lut ve thung.

Arsenal hi nomawi an la ta lo a nih chuan khelh hmabak vawi 10 la nei chunga point 69 hmu tling thei zinga champion lo pahnihna an ni dawn a. 2018-19 khan Liverpool chu an dinhmun chiahah lo ding tawhin a tawpah point 97 zet hmu phak mah se City-in point khatin an lo champion khalh tawh.

Gunners tana remchang awm lian ber chu league chauhvah an insawrbing thei tawh a. City erawh chuan FA Cup leh Champions League-a champion tumin an theihna zawng zawng an la chhuah a ngai a, season tawp hmain vawi 10 vel inlan an la ngaih laiin London club hian vawi li chauh khelh tur an nei tawh thung.

Eng pawh ni se City dinhmun a tha zawk tho tih phat rual a ni lo va; mahse, Arteta leh a neute leh anmahni tantute an la beidawng lo, thil mak danglam tam tak thleng thei a la awm teuh va, thleng miah lovin season an tawp thei bawk, kan sawi hi football a ni tlat.